Krijuesit e TikTok do të jenë në gjendje t’i kufizojnë videot vetëm për të rriturit

Krijuesit e videove të TikTok që prodhojnë më shumë përmbajtje për të rritur do të marrin së shpejti më shumë mjete për të kufizuar audiencën e tyre.

Krijuesit do të kenë mundësinë të parandalojnë përdoruesit nën moshën 18 vjeç që të shohin videot e tyre në TikTok nëse ata mendojnë se përmbajtja është e përshtatshme vetëm për shikuesit më të vjetër, dhe kjo përfshin përmbajtje sugjeruese seksuale që nuk shkel rregullat.

TikTok njoftoi në tetor se krijuesit do të marrin veçori të reja për transmetimet e tyre të drejtpërdrejta, në lidhje me kufizimet e moshës, në mënyrë që të mund të bllokojnë të miturit dhe t’i pengojnë ata të shikojnë përmbajtje të papërshtatshme. Megjithatë, kufizimet tani po shtrihen edhe në klipet standarde dhe do të jenë të disponueshme për përdoruesit në mbarë botën në javët e ardhshme.

“Për të qenë të qartë, rregullat tona zbatohen ende plotësisht për krijuesit që përdorin këtë veçori dhe ne do të heqim përmbajtjen që lidhet me lakuriqësinë, si dhe përmbajtjen që shkel rregullat e tjera të komunitetit tonë”, njoftoi TikTok.

Algoritmi i rekomandimeve të TikTok u shërben përdoruesve përmbajtje të ndryshme në vazhdimësi të shpejtë dhe ata shpesh janë pa një lidhje të përbashkët. Kjo do të thotë që një video e një fëmije duke luajtur Minecraft mund të pasohet nga një video e një personi të famshëm në pushime.

Platforma të tjera si Instagram gjithashtu kufizojnë qasjen në përmbajtje të ndjeshme. Kompania përditësoi cilësimet e saj në qershor për t’i lejuar përdoruesit të përcaktojnë llojet e referimeve që duan të lejojnë, me opsione që ndryshojnë nga strikte në plotësisht fleksibël. Krijuesit dhe profilet profesionale mund të caktojnë një moshë minimale për shikimin e përmbajtjes së tyre. /Telegrafi/