Kongresisti Eliot Engel njoftohet me sukseset e sektorit privat në Kosovë

Njëri ndër miqtë më të mëdhenj të Kosovës, kongresmeni amerikan Eliot Engel, vizitoi kompaninë prodhuese KIVO në Kaçanik. I shoqëruar nga bashkëshortja e tij, Patricia Ennis, bashkëpunëtorët e ngushtë, atdhetari dhe biznesmeni shqiptaro-amerikan, Harry Bajraktari, përfaqësues të USAID dhe drejtori ekzekutiv i Odës Ekonomike Amerikane, Arian Zeka, ai u njoftua me të arriturat e kompanisë, e cila është njëra ndër tregimet më të suksesshme të investimeve në Kosovë.

Bashkëthemeluesi i kompanisë, Visar Ramajli, informoi kongresistin Engel lidhur me funksionimin, si dhe mundësitë e të bërit biznes në Kosovë. Ai falënderoi Engel për kontributin e tij të rëndësishëm për lirinë dhe pavarësinë e Kosovës.

Ramajli i cili është edhe sekretar gjeneral i Bordit të Guvernatorëve të Odës Ekonomike Amerikane, theksoi se tani është momenti që në Uashington të flitet për nevojën e rritjes së investimeve amerikane në Kosovë, duke shtuar se përgjatë viteve ka pasur përmirësim të madh në mjedisin e të bërit biznes në Kosovë.

Lexo po ashtu Kongresisti Eliot Engel: E dua Kosovën

Në anën tjetër, i impresionuar me të arriturat e kompanisë, Engel tha se tregimet e tilla të suksesit janë pasqyrimi i vërtetë i shpirtit të kosovarëve. Ai u shpreh krenar me angazhimin e tij për Kosovën, duke shtuar se edhe pas 30 viteve të karrierës së tij politike, sërish do ta vinte Kosovën në krye të prioriteteve të tij.

Kongresisti Eliot Engel qëndroi ditëve të fundit në Kosovë, ku mes tjerash mori pjesë edhe në përurimin e ndërtesës së re të Ambasadës së Shteteve të Bashkuara të Amerikës në Prishtinë. /Telegrafi/