Konferenca e 51-të rajonale e Interpolit në Tiranë, Balla: Shqipëria e sigurt për turistët, të përkushtuar kundër krimit

Ka nisur punimet sot në Tiranë konferenca e 51-të rajonale e Interpol, e cila do të zgjasë deri më 13 qershor.

Ministri i Brendshëm Taulant Balla, në fjalën e hapjes theksoi se edhe pse kemi patur mbi 10 milionë turistë të huaj në vitin 2023, nuk ka patur asnjë incident apo krime fatale që të përfshinin turistët e huaj.

Balla në fjalën e tij theksoi se Shqipëria është transformuar gjatë viteve të fundit.

“Shqipëria e të gjitha ndjesive, shijet dhe mikpritjen dhe me sigurinë publike. Unë shpresoj dhe uroj që të gjeni kohë, të shijoni bukuritë mesdhetare që janë të veçanta, Alpet, plazhet blu dhe trashëgimitë kulturore të UNESCO-s.”

“Është hera e parë që Shqipëria po drejton një event të Interpol të kësaj natyre. Kemi drejtuar samitin e BE para disa muajsh. Të ftuarit që mund të kenë vizituar Shqipërinë 10 vite, 20 vite apo 30 vite më parë janë të mahnitur nga progresi dhe zhvillimi i madh që Tirana ka bërë, ashtu si dhe i gjithë vendi ynë”, tha Balla.

Ministri i Brendshëm nënvizoi se “vitin e fundit më shumë se 10 milionë turistë vizituan vendin, që ishte rekordi i të gjitha kohërave, shifër kjo që do të kalohet në vitin 2024, pasi priten mbi 14 milionë turistë. Në aeroportin “Nënë Tereza” ka më shumë se 250 fluturime në ditë, në 1991 kemi patur 3 fluturime në javë. Dhe pavarësisht këtij fluksi, vitin e kaluar kanë ndodhur 0 krime fatale apo incidente që përfshinë turistët”, tha Balla.

Gjatë fjalës së tij Balla tha se Shqipëria mbetet e përkushtuar në luftën kundër krimit të organizuar dhe korrupsionit.

Balla tha gjithashtu se sfida e vërtetë e Policisë është të gjejë personat fajtorë dhe t’i dërgojë ata para drejtësisë.

Sipas Ballës, rezultatet e arritura nga Policia e Shtetit e kanë bërë atë ndër institucionet më të besuara në Shqipëri.

“Shqipëria mbetet shumë e përkushtuar në luftën kundër krimit të organizuar, korrupsionit dhe narkotikëve. Ne kemi ndërmarrë një reformë në sistemin e drejtësisë, për të forcuar sundimin e ligjit në institucione dhe kemi filluar të mbledhim të gjithë rezultatet e mira.

Kemi filluar të mbledhim të gjitha rezultatet e mira. Lufta që ne kemi është për të gjetur personat që janë fajtorë dhe për t’i sjellë para drejtësisë. Shqipëria do të mbetet gati për bashkëpunim. Këto rezultate kanë çuar Policinë e Shtetit ndër institucionet më të besuara në vend”, tha Balla. /Telegrafi/