Liverpool ka konfrimuar shitjen e portierit Caoimhin Kelleher (26) te Brentford për një shifër totale prej 18 milionë funte (rreth 21 milionë euro), përfshirë bonuset.
Megjithatë, një pjesë e këtij transferimi nuk do të shkojë në arkat e Liverpoolit, pasi klubi anglez do të paguajë 20 përqind të shumës për Ringmahon Rangers, klubin irlandez ku Kelleher nisi karrierën e tij.
Ringmahon Rangers, një klub amator nga divizioni i tretë në Irlandë, do të përfitojë rreth 3 milionë euro nga kjo marrëveshje. Kjo shumë mund të rritet në mbi 4 milionë euro nëse Kelleher arrin objektivat dhe bonuset.
Për një klub të vogël si Ringmahon, këto para janë një shifër e jashtëzakonshme që, sipas mediave irlandeze, “do ta sigurojë financiarisht për dekada të tëra”.
Për krahasim, Ringmahon e liroi Kelleherin te Liverpooli për vetëm 15 mijë euro disa vite më parë. Përmes bonuseve të tjera, përfshirë paraqitjet e tij me Kombëtaren e Irlandës, ata morën edhe 150 mijë euro nga Liverpooli.
Tani, me këtë transferim të madh, Ringmahon shënon një sukses të jashtëzakonshëm financiar.
Kelleher kaloi një dekadë në Anfield, ku e nisi karrierën si 17-vjeçar dhe u shqua si zëvendësuesi i parë i Alisson Becker. Ai ka bërë 67 paraqitje për Liverpoolin dhe ka mbledhur 22 ndeshje me Kombëtaren e Irlandës.
Përkundër rolit të tij si rezerva e Alissonit, Kelleher kishte shprehur dëshirën për të qenë portier titullar – një dëshirë që tashmë do ta realizojë me Brentfordin.
Liverpooli, ndërkohë, ka siguruar një pasues të Alissonit për sezonin e ardhshëm, pasi ka nënshkruar me Giorgi Mamardashvilin nga Valencia për 30 milionë euro.
Ky transferim jo vetëm që i plotëson ëndrrat e Kelleherit për të luajtur rregullisht, por gjithashtu e shpërblen Ringmahon Rangers me një shumë të madhe që mund të transformojë të ardhmen e klubit. /Telegrafi/
