Këshilltari i Departamentit të Shtetit, bisedë telefonike me Kurtin, Chollet: Rikonfirmova mbështetjen e palëkundur për sovranitetin e Kosovës

Kryeministri i Kosovës, Albin Kurti, ka zhvilluar sot një bisedë telefonike me këshilltarin Special në Departamentin Amerikan të Shtetit, Derek Chollet, me të cilin kanë biseduar për disa çështje, nbdër to edhe për zgjedhjet parlamentare e presidenciale serbe të 3 prillit.

Është këshilltari i Departamentit Amerikan, ai që ka njoftuar përmes një postimi në rrjetin social Twitter se me kryeministrin Kurti ka pasur një telefonatë fantastike, përmes së cilës ia ka konfirmuar mbështetjen e palëkundur amerikane për sovranitetin e Kosovës.

Chollet ka thënë se gjatë bisedës Kurtit ia ka përmendur zgjedhjet e Serbisë që do të mbahen në prill dhe kanë diskutuar për rastet kur shtetet e OSBE-së i kanë pranuar kërkesat e shteteve të tjera për t’u lejuar votimi fizikisht.

“Telefonatë fantastike me kryeministrin Albin Kurti. Rikonfirmova mbështetjen e palëkundur për sovranitetin e Kosovës. Përpara kemi zgjedhjet e Serbisë në prill, u diskutuan rastet kur shtetet e OSBE-së i kane pranuar kërkesat e shteteve të tjera për t’u lejuar votimi fizikisht. Falënderoj Kosovën për bujarinë e saj që priti afganët”, ka shkruar Chollet, transmeton Telegrafi.

Great call with PM @albinkurti. I reaffirmed unwavering support for Kosovo’s sovereignty. Looking to Serbia’s April elections, discussed practices when OSCE states have agreed to other states’ requests for in-person voting. Thanked 🇽🇰 for its generosity hosting Afghans.

— Derek Chollet (@CounselorDOS) February 18, 2022

Ndryshe, në Serbi më 3 prill do të mbahen zgjedhjet parlamentare dhe ato presidenciale, në të cilat presidenti aktual Aleksandar Vuçiq synon edhe një mandat.

Ndërkohë, pritet që ndaj Kurtit të shtohen presionet e ndërkombëtarëve që të lejojë votimin e serbëve lokalë të Kosovës në këto zgjedhje.

Të përkujtojmë se sivjet, më 16 janar, nuk u lejua hapja e vendvotimeve në Kosovë, për votimin e serbëve në referendumin e Serbisë.

Me kërkesën e kryeministrit Kurti Kuvendi i Kosovës, në një seancë të jashtëzakonshme, më 15 janar të këtij viti miratoi rezolutën që kundërshtonte mbajtjen e votimeve në Kosovë për referendumin e shtetit të Serbisë, për ndryshime kushtetuese. /Telegrafi/