Kaka, futbollisti i javës (Video)

Paraqitjet e Ricardo Kaka në dy ndeshjet e fundit në Serie A, na bëjnë ta kujtojmë futbollistin që ia fitoi Milanit trofeun e Ligës së Kampionëve (2007) dhe fitoi Topin e Artë.

Braziliani ishte mahnitës në fitoren prej 2-0 në udhëtim ndaj Fiorentinas në mesjavë, ndërsa shkëlqeu në triumfin prej 3-0 kundër Chievos.

Veç paraqitjeve të mira, 31-vjeçari shënoi dy gola në ndeshjen e fundjavës, ashtu që portale të ndryshme sportive e kanë emëruar atë si lojtarin që ka bërë paraqitje më të mirë në javën që lamë pas.

Rikthimi i tij nga Real Madridi në San Siro, fillimisht nuk ishte ai që është pritur, mirëpo me kalimin e kohës duket se Kaka po e rikthen formën që na ka bërë të gjithëve ta pëlqejmë si lojtar.

Ndeshja ndaj Chievos ishte e 300-ta e tij me fanellën kuqezi.

Të shpresojmë që ai do ta bindë përzgjedhësin e Brazilit që ta përfshijë në skuadrën e Selecaos që do të luajë në Kampionatin Botëror 2014.

Në videot e mëposhtme, ju sjellim dy golat e Kaka të shënuar kundër Chievos. /Telegrafi/