Kadriu: Kushtet atmosferike pamundësojnë vazhdimin e punimeve në urën e autostradës “Arbën Xhaferi”

Kushtet atmosferike, të cilat mbretërojnë aktualisht në territorin e Kosovës, kanë bërë të pamundur vazhdimin e punimeve në autostradën “Arbën Xhaferi”, përkatësisht asfaltimin e urës të kësaj rruge.

Këtë e ka konfirmuar për Telegrafin, zëvendësministri i Infrastrukturës, Rexhep Kadriu, i cili thotë se afati i përfundimit të urës është deri më 31 dhjetor, por sipas tij, janë duke shikuar mundësitë e kontratës lidhur me shtyrjen e punimeve.

Kadriu ka thënë se punimet duhet të kryhen në mënyrë cilësore dhe të mos rrezikohen ato.

“Shtyrja e afatit momentalisht është bërë për shkak të temperaturave të ulëta, sepse nuk mundemi që ta asfaltojmë urën ngase të gjitha segmentet e tjera janë përfunduar. Ka mbetur vetëm ura 5.7 kilometra pa asfaltuar dhe ne nuk guxojmë të rrezikojmë urën dhe kualitetin e ndërtimit të asaj ure për shkak të kohës që mbretëron në Republikën e Kosovës. Sipas gjendjes që është parë në terren është e pamundur të bëhet asfaltimi i urës më të gjatë dhe më të lartë në Ballkan dhe kështu ne nuk duam që të rrezikojmë punimet në atë urë dhe kualitetin e punimeve që duhet bërë në shtresimin e saj”, tha Kadriu për Telegrafin.

Ai ka shtuar se procedurat e përfundimit të projektit mund të shtyhen dhe për këtë, Ministria e Infrastrukturës është duke shikuar mundësitë e kontratës.

“Në kontratë thirremi në atë se për shkak të kushteve atmosferike munden të shtyhen dhe procedurat e përfundimit të projektit. Në këtë rast kemi kushtet atmosferike të cilat na diktojnë në dinamikë të punimeve. Nuk është problemi te Ministria Infrastrukturës, por të kushtet e rënda atmosferike. Ne afatin e kemi deri me datë 31 [dhjetor], mirëpo ne si Ministri e Infrastrukturës jemi duke e parë kontratën se si mundemi dhe t’i qasemi zhvillimeve tutje. E rëndësishme është se ura të kryhet me një kualitet të lartë, nuk është më rëndësi të kryhet tri javë përpara apo tri javë mbrapa”, ka shtuar ai.

Lexo po ashtu Ministria e Infrastrukturës thotë se të gjitha rrugët janë të qarkullueshme

Lidhur me vonesat në punimet e kësaj rruge ka reaguar edhe avokati Arianit Koci.

Koci me anë të një postimi në profilin e tij në Facebook ka shkruar se autostrada “Arben Xhaferi” nuk ka gjasa të kryhet sipas afatit të paraparë dhe ka kërkuar që Qeveria e Kosovës të aplikoj ndëshkimet lidhur me vonesat.

“Autostrada Arben Xhaferi (rruga për Shkup), nuk ka gjasa të kryhet në afatin e paraparë kontraktues – sipas informatave që janë dhënë në publik. Tash, Qeveria duhet t’i aplikoj ndëshkimet. I zbresim prej obligimit 53 – milionësh që i kemi!”, ka shkruar Koci.

Lexo po ashtu Zharku: Pagesa prej 53 milionë euro për autostradën është joligjore

Kujtojmë se Qeveria e Kosovës kishte miratuar kërkesën për kompensimin e 53 milionë eurove për konsorsiumin “Bechtel & Enka” lidhur me zgjatjen e kontratës. /Telegrafi/