Kacin: Sllovenia së shpejti do ta ratifikojë protokollin për anëtarësim të Maqedonisë në NATO

Ambasadori slloven në NATO, Jelko Kacin, tha se pas ratifikimit të marrëveshjes së Prespës në Greqi, Maqedonia mund të bëhet anëtare e NATO-s në më pak se një vit, njofton korrespondenti i AIM-së nga Brukseli.

Kacin për media tha se nëse gjithçka shkon ashtu siç dëshirojnë të gjithë, “flamuri i Maqedonisë mund të valëvitet përpara selisë së NATO-s kah fundi i këtij viti, më së voni në fillim të vitit 2020”

Maqedonia do të bëhet anëtare e Aleancës “de fakto së shpejti, por de jure pasi të gjithë aleatët të ratifikojnë protokollin e pranimit”.

“Ne jemi të gatshëm dhe kam leje nga qeveria sllovene për të nënshkruar protokollin e pranimit”, tha Kacin.

Ambasadorët e shteteve anëtare të NATO-s duhet të marrin dritën e gjelbër për miratimin e protokollit të pranimit në dhjetë ditët e ardhshme, pas së cilës Maqedonisë do t’i lejohet të marrë pjesë në të gjitha formatet kryesore të Aleancës si vëzhguese. Sapo të ratifikohet protokolli i pranimit nga të gjitha vendet, Maqedonia do të bëhet anëtare e plotë e NATO-s.

Sipas diplomatëve në NATO, të martën e ardhshme, Maqedonia mund të përfshihet në agjendën e Këshillit të Atlantikut të Veriut ose NAC./Telegrafi/