Joshua nuk do të ndeshet me Pulevin në prill, rriten gjasat për superduelin ndaj Wilder

Anthony Joshua nuk do të përballet me Kubrat Pulevin në Wembleyn më 13 prill, ka konfirmuar Federata Ndërkombëtare e Boksit (IBF).

Gjatë verës që lamë pas, kampioni i WBA, WBO dhe IBF zhvilloi bisedime intensive për një duel unfikues me kampionin e WBC-së, Deontay Wilder.

Mirëpo, negociatat dështuan dhe më 22 shtator, britaniku u përball me sfiduesin obligativ, Alexander Povetkin, të cilin e mposhti në raundin e shtatë me nokaut.

Duke qenë se është kampion në divizione të ndryshme në kategorinë e peshave të rënda, AJ duhet që kohë pas kohë të zhvillojë meçe të detyrueshme nga organizatat e ndryshme për t’i mbrojtur titujt.

Lexo po ashtu Lajmet për Anthony Joshua

Kjo ka bërë që dy meçet e fundit të Joshuas të jenë kundër Carlos Takam (IBF) dhe Povetkin (WBA).

Është spekuluar se sfiduesi i tij mund të jetë i pari në listën e IBF, Pulev. Boksieri bullgar e mposhti Hughie Furyn në një duel final eliminator më 27 tetor, kështu që në një të ardhme mund të përballet me kampionin e unifikuar, Anthony Joshua.

Megjithatë, nga IBF kanë thënë për talkSPORT se meçi i radhës i britanikut do të jetë për mbrojtjen e titullit WBO dhe i pari në listë është Dillian Whyte. Mirëpo, ai është alternativë në qoftë se nuk ndodh supermeçi ndërmjet AJ dhe Wilder.

Në ndërkohë, boksieri amerikan është i preokupuar me duelin ndaj Tyson Furyt që do të zhvillohet me 1 dhjetor dhe e ka të garantuar rimeçin në rast se humb.

Kjo do të jetë hera e tetë që Wilder e mbron titullin WBC dhe fitorja do ta bënte favorit për t’u ndeshur me Joshuan në muajin prill dhe dueli do të zhvillohej për unifikimin e titujve dhe shpalljen e kampionit të padiskutueshëm. /Telegrafi/