Izrael-Palestinë: “Është rënë dakord për një armëpushim, detajet duke u negociuar në fshehtësi”

Një zyrtar i lartë i Hamasit ka parashikuar një armëpushim brenda pak ditësh ndërsa Izraeli dhe militantët e Gazës vazhduan sulmet në një ditë të 11-të të enjten me aeroplanët luftarakë Izraelitë që kryen sulme të reja ajrore dhe palestinezët që qëlluan më shumë raketa.

Sipas mediave të huaja, përcjell Telegrafi, presidenti i SHBA-së, Joe Biden i kërkoi kryeministrit izraelit Benjamin Netanyahu të kërkojë një “de-përshkallëzim” të mërkurën në rrugën e një armëpushimi.

Një burim i sigurisë egjiptiane tha se palët kishin rënë dakord në parim për një armëpushim pas ndihmës nga ndërmjetësit, por që detajet ishin ende duke u negociuar në fshehtësi.

“Unë mendoj se përpjekjet e vazhdueshme në lidhje me armëpushimin do të kenë sukses”, tha zyrtari politik i Hamasit, Moussa Abu Marzouk, për TV al-Mayadeen të Libanit.

“Unë pres që një armëpushim të arrihet brenda një ose dy ditësh, dhe armëpushimi do të bëhet në bazë të marrëveshjes së ndërsjellë”.

Ndërkohë televizioni Al Jazeera me bazë në Katar njoftoi se i dërguari i paqes i KB-së në Lindjen e Mesme Tor Wennesland po takonte shefin e Hamasit, Ismail Haniyeh në Katar.

Por luftimet vazhduan me Izraelin dhe militantët që shprehën kundërshtim.

Kështu Izraeli kreu mbi një duzinë sulmesh ajrore në Gaza pas mesnatës, duke përfshirë dy që shkatërruan dy shtëpi. Mjekët thanë se katër vetë u plagosën në një sulm ajror në qytetin Khan Younis në Gazan jugore.

Gjithashtu Ushtria e Izraelit tha se avioni i saj herët të enjten goditi atë që tha se ishte një “njësi magazinimi armësh” e vendosur në shtëpinë e një zyrtari të Hamasit në Gaza dhe “infrastrukturë ushtarake e vendosur në rezidencat” e komandantëve të tjerë të Hamasit, duke përfshirë në Khan Younis.

Sirenat e raketave shpërthyen herët të enjten në qytetin jugor izraelit të Beersheba dhe në zonat në kufi me Gaza. Nuk ka njoftime të menjëhershme për viktima ose dëme.

Që nga fillimi i luftimeve në 10 maj, zyrtarët palestinezë të shëndetësisë thonë se 228 njerëz janë vrarë në bombardimet ajrore që kanë përkeqësuar gjendjen tashmë të tmerrshme humanitare të Gazës.

Në anën tjetër autoritetet izraelite kanë folur për të vdekurit numër që thuhet se deri më tani ka arritur në 12 në Izrael, ku sulmet e përsëritura me raketa kanë shkaktuar panik dhe kanë bërë që njerëzit të vrapojnë drejt strehimoreve. /Telegrafi/