Ish-ministri i Drejtësisë pasi Kuvendi refuzoi Kodin Civil: Çfarë do t’i thotë Kurti kongresistit Torres që është deklaruar hapur homoseksual

Ish-ministri i Drejtësisë, Selim Selimi e quan gabim të Kuvendit të Kosovës refuzimin për të miratuar ndryshimet në Kodin Civil të Kosovës.

Selimi në “Debat Plus” me Ermal Pandurin në RTV Dukagjini ka thënë se gabimi më i madh ka qenë Kurtit që nuk ka mundur të bind deputetët e tij për një ligj aq të rëndësishëm.

“Sot deputetët e Kuvendit votuan edhe kundër të drejtave të grave. Deputetët votuan kundër trashëgimisë, votuan kundër motrave tona pasi nuk iu ndahet pasuria”.

Ai thotë se këtë ligj e kanë pranuar Sllovenia, Mali i Zi por nuk e pranoi Kosova.

“Ata që ishin kundër sot e pashë e kanë huq poentën e Kodit Civil”.

Lexo po ashtu Dështon miratimi i Projektkodit Civil që rregullon bashkëjetesën mes personave të gjinisë së njëjtë

“Barra kryesore i bie partisë në pushtet pasi i ka 61 vota. Kjo parti sa mundet ia bënë twet, ri-tweet, share deklaratës së Ritchie Torres i cili iu kërkoi pesë vendeve të BE-së ta njohin Kosovën. Ai ka deklaruar haptas se është gay. Kjo parti ka standard të dyfishtë dhe nuk i mbledh deputetët e saj për këtë çështje të rëndësishme”.

Selimi thotë se pozita e ka pas për detyrë t’i mbledh deputetët e saj për të votuar Kodin Civil.

“Nesër pasnesër do të kemi një kryeministër që shkon në Amerikë. Çfarë do t’i thotë ai Richard Torresit i cili është pasardhës i Eliot Engel-mbështetësi më i madh i shqiptarëve”.

Ish-ministri nga radhët e AAK-së thotë se ministrja Haxhiu sot e ka bërë detyrën e vet si duhet.

“Ky refuzim i jep Kosovës një disavantazh në rrafshin ndërkombëtar pasi ne i kemi përfaqësuar vlerat perëndimore”, deklaroi Selimi./Telegrafi/