Ish-ambasadori Bosch: Që nga fillimi isha kundër Gjykatës Speciale

Ish-ambasadori i Holandës në Kosovë, Robert Bosch ka deklaruar se gjithnjë ka qenë kundër krijimit të Gjykatës Speciale dhe se është e çuditshme se si po vazhdohet me këtë gjykatë kur arsyeja kryesore e trafikimit të organeve nuk ekziston.

Bosch thekson se kjo gjykatë duhet të jetë një shembull dhe të mos mbahen në paraburgim njerëzit për një kohë kaq të gjatë pa asnjë aktakuzë.

Ai flet edhe për iniciativën kundër kësaj gjykate të kryeministrit të Shqipërisë, Edi Ramës në Këshillit të Evropës, por druan se do të dështojë.

“Gjykata Speciale, edhe pse nuk mund ta thosha atëherë, meqë përfaqësoja qeverinë holandeze, kam qenë gjithnjë kundër saj. Natyrisht, kjo Gjykatë Speciale është krijuar bazuar në trafikimin e organeve, gjë që në këtë rast do të ishte e tmerrshme, sikur ky të ishte rasti, porse raporti i Williamsonit thotë se ky nuk ishte rasti. Prandaj është e çuditshme se si u vazhdua me këtë gjykatë, meqë evropianët po paguajnë para të majme për këtë.

Dhe, ndoshta krimet edhe kanë ndodhur, porse krimet ndodhin gjithandej nëpër botë ku ka konflikte, megjithatë për to nuk ka Gjykata Speciale për secilin vend. Më e keqja çka kemi parë ka qenë ISIS. A ka ndonjë Gjykatë Speciale për ISIS? Krimet që janë kryer aty kanë qenë krimet më të tmerrshme që unë mund t’i imagjinoj. Prandaj, unë nuk e di pse kjo gjykatë-kjo gjykatë shumë e shtrenjtë, është akoma e nevojshme kur arsyeja kryesore e trafikimit të organeve nuk ekziston”, thotë ai.

E lidhur me vlerësimin e bashkësisë ndërkombëtare për mbarëvajtjen e kësaj gjykate, Bosch thotë “Nuk e di meqë tash kur jam i pensionuar nuk jam aq i përfshirë dhe nuk mund të them dhe aq, porse jam në dijeni për iniciativën e Ramës për t’i prezantuar edhe një herë këto çështje para Këshillit të Evropës.

Besoj se kjo është një iniciativë e mirë, por druaj në mos po dështon, meqë vështirë Këshilli i Evropës thotë se ka qenë gabim. Ndoshta do të ishte më mirë nëse do të prezantohet një rezolutë e re në vend të kritikës për raportin e vjetër”.

Ndërkaq, se çfarë mund të bëjnë institucionet e Kosovës dhe të Shqipërisë për të krijuar mekanizma mbikëqyrës për këtë gjykatë ish ambasadori thotë “Nuk e di a është e koordinuar, porse së paku po ndodh: Shqipëria dhe Kosova po bashkëpunojnë në mënyrë aktive për të bërë diçka për këtë gjykatë. Shpresoj se ka një koordinim për këtë çështje, nuk e di. Por meqë e dimë se raportet ndërmjet dy liderëve të dy vendeve nuk janë njëqind për qind të mira… e kjo është një mëkat.

Mendoj se maksimum janë dy vjet sa dikush mund të mbahet në paraburgim dhe kur nuk ka aktakuza akoma, atëherë duhet ndalur. Posaçërisht kur kemi të bëjmë me një organ ndërkombëtar si ky, atëherë ky duhet të jetë shembull se sa ndershëm bëhen këto gjykata. Kjo gjykatë duhet të jetë një shembull i tillë dhe të mos mbahen në paraburgim njerëzit për një kohë kaq të gjatë dhe akoma s’kemi asnjë aktakuzë”.