iPad ndihmon në zgjidhjen e krimit pas pesë viteve

Nga Britania e Madhe vjen një histori si nga filmat hollivudianë, ku në rolin kryesor është iPad-i i Apple-it, i cili ka luajtur rolin e “heroit” në zgjidhjen e një rasti vjedhjeje dhe përpjekjeje për vrasje.

E gjithë kjo ka filluar me vjedhjen e një vaze nga dinastia Ming nga një muze në Zvicër, një shkëmbim zjarri në shtëpinë e një komediani në Woodford, Londër, dhe një grabitje në një apartament luksoz. Në dukje, këto raste nuk dukeshin të lidhura, por në fakt, ato janë pjesë e një rrjeti të komplikuar ndërkombëtar kriminal, që policia arriti ta zbulojë pas gjashtë vjetësh hetimesh.

Moment kyç ndodhi kur nën baltën dhe rërën në bregun e lumit Temzë u gjet një iPad mini. Ky tablet rezultoi të ishte prova kyçe që ndihmoi policinë në zgjidhjen e rastit. Falë këtij aparati, tre persona u dënuan për përfshirje në përpjekjen për vrasje të njërit prej grabitësve më të njohur britanikë.

Një nga momentet më të rëndësishme në zgjidhjen e rastit ndodhi në nëntor të vitit 2024, kur një gjurmë e vogël në një deklaratë i çoi policinë në një lokacion të caktuar në bregun e lumit Temzë. Me ndihmën e detektorëve të metalit, u gjet iPad-i nën rërë dhe baltë. Falë ekipit të forenzikëve, policia arriti të gjente kartën SIM dhe të dhënat që lidhën iPad-in, iPhone-in dhe disa të dyshuar, duke zbuluar kështu rastin.

Policia mundi të ndjekë adresat e email-eve deri tek i dyshuari kryesor dhe partneri i tij, dhe u hetuan gjithsej 59 blerje në Amazon dhe eBay. Ndër produktet e blera ishin dhe telefona Nokia të pa regjistruar, të cilët ishin përdorur për të koordinuar komplotin për vrasje.

Në fund, tre burra, të cilët ishin kriminelë ndërkombëtarë të eksperiencës, u kapën dhe u çuan në drejtësi pasi detektivët ndjekën teknologjinë e tyre të hedhur. Ata u dënuan për komplot për vrasje, dhe dënimi do të shpallet më 25 prill.

Ky nuk është i vetmi aparat që ka luajtur një rol në zgjidhjen e krimeve. Pajisjet Apple AirTag po bëhen heronj në shumë histori, duke ndihmuar në gjetjen e objekteve të vjedhura, por edhe policinë në kapjen e hajdutëve. /Telegrafi/