Intensifikohet fushata parazgjedhore, shtohen premtimet e partive politike

Partitë politike dhe koalicionet që do të marrin pjesë në zgjedhjet e 15 korrikut, i kanë vazhduar aktivitetet e tyre në kuadër të fushatës parazgjedhore.

Telegrafi Maqedoni jua sjell të përmbledhura në një vend, takimet të cilat ata i relizuan me qytetarët.

PDSH dje ka mbajtur takim në disa fshatra të Komunës së Krushevës dhe në Gostivar. Kryetari i PDSH-së Menduh Thaçi në Nerovë të Krushevës, tha se me ardhjen e PDSH-së në pushtet kostoja e lartë e prodhimit të produkteve bujqësore do të ulet.

Ai deklaroi se PDSH do të mundësojë që personat që zhvillojnë veprimtari të tillë të arrijnë më lehtë deri te subvencionimet.

Koalicioni Aleanca për Shqiptarët – Alternativa, dje kanë mbajtur takime me banorët e Komunës së Zhelinës. Kandidatja për deputete nga ky koalicion Ilire Dauti, tha se me fitoren e tyre ata do të bëjnë shtet për të gjithë.

“Ata ia kanë humbur kuptimin fjalës ‘premtim’. Kjo fjalë tani, fatkeqësisht tingëllon si diçka e pamundshme, e parealizueshme dhe e paarritshme. Ata mbollën krim dhe korrupsion ngado. Ndërsa atyre që do të vijnë t’u kërkojnë mbështetje në emër të “shoqërisë për të gjithë”, t’u thoni se shoqëria është e përbashkët, e të gjithëve, ndërsa ne themi se shteti duhet të ketë i përbashkët dhe i barabartë për të gjithë. E ne me mbështetjen tuaj do ta bëjmë realitet “shtetin për të gjithë””, tha Ilire Dauti.

Kandidati për kryeministër nga radhët e BDI-së Naser Ziberi, dje realizoi takime me mësuesit në shkollën “Hasan Prishtina” në Çair. Ai tha se barazia do të fillojë me arsimin.

“Plani im i veprimit gjatë 100 ditëve të para si Kryeministri shqiptar përfshin zotimin që parasheh një ardhmëri më të mirë për rininë sonë. Ne do ta bëjmë arsimin parashkollor të detyrueshëm dhe do të ofrojmë kopshtet për fëmijë në çdo komunë”, theksoi Naser Ziberi.

Koalicioni “Mundemi” i udhëhequr nga LSDM, pjesë e të cilit është edhe Lëvizja Besa, dje kanë qëndruar në Strugë. Zoran Zaev, prej atje kërkoi mbështetjen e qytetarëve që siç tha, të mbajnë leksione ekonomike vendeve të rajonit.

“Është e rëndësishme t’i formojmë institucionet. Faktorët thonë se kriza do të vazhdojë, ndërsa kjo tregon se shtetit dhe qytetarëve ju duhen institucione funksionale”, tha Zaev.

Ndërsa koalicioni i udhëhequr nga OBRM-PDUKM, dje ka pasur takime me qytetarët e Kërçovës. Hristijan Mickoski tha se ky është moment kyç, me çka edhe kërkoi mbështetjen e qytetarëve.

“Për shkak të papërgjegjësisë së qeverisë, situata me virusin po zgjat më shumë tek ne dhe Evropa i ka mbyllur kufijtë për qytetarët tanë. Kot që nuk kemi viza dhe gjithë ajo që e kemi bërë në të kaluarën. Kjo në mënyrë shtesë duhet të na motivojë që më 15 korrik të bashkohemi dhe ta mbështesim Maqedoninë”, tha Mickoski./Telegrafi/