Inflacioni në Britani të Madhe rritet në nivelin më të lartë brenda 3 viteve

Inflacioni në Britani të Madhe është rritur në nivelin më të lartë në gati tre vjet për shkak të rritjes së çmimeve të ushqimeve dhe karburantit të mjeteve.

Zyra për Statistikat Kombëtare tha se norma vjetore e inflacionit u rrit në 2.5 për qind në muajin qershor nga 2.1 për qind një muaj më parë. Shkalla e qershorit është më e larta nga gushti i 2018, kur inflacioni arriti 2.7 për qind.

Rritja ka çuar inflacionin mbi objektivat e Bankës së Anglisë prej 2 për qind dhe ka nxitur spekulime se banka qendrore britanike do të duhet të përgjigjet në një fazë së shpejti për të mbajtur një nivel mbi presionet e çmimeve në ekonomi.

Shumë vende rreth botës po përjetojnë një rritje të mprehtë të inflacionit ndërsa ekonomitë e tyre po rikuperohen nga goditja që morën prej fillimit të pandemisë COVID-19.

Shifrat zyrtare treguan se norma vjetore e inflacionit në Shtetet e Bashkuara arriti në 5.4 për qind, niveli më i lartë në 13 vjet.

Bankat qendrore në të gjithë botën shpresojnë që rritja e mprehtë e inflacionit të jetë për shkak të faktorëve të përkohshëm, dhe që do të stabilizohet në muajt në vijim. /Telegrafi/