Imami Labinot Maliqi: Presim që Qeveria Kurti të mbajë premtimet në raport me muslimanët dhe të lejojë shkollimin e vajzave me shami

Imami Labinot Maliqi ishte i pranishëm sot në Komisionin e Kuvendit të Kosovës ku u diskutua për nxënëset që mbajnë shami.

Maliqi në RTV Dukagjini ka thënë se vajzat që mbajnë shami në shkolla kanë hasur probleme që nga viti 2004 kur Avokat i Popullit ishte Mareck Novitski.

Imami thotë se probleme kanë hasur edhe nga ministrat në vijimësi.

Ai thotë se problemin më të fundit e ka pasur me ish-ministrin Ramë Likaj gjatë një telefonate që kanë pasur.

“Ish-ministri i Arsimit Ramë Likaj më tha “derisa unë jam ministër shkollat nuk do të kthehen në medrese””, tha ai, përcjell Telegrafi.

Maliqi thotë se edhe ish-zëvendëskryeministri Enver Hoxhaj e ka një kontribut negativ që shumë vajza nuk kanë mundur të shkojnë në shkollë.

Imami thotë se presin nga Qeveria Kurti që të zgjidh problemin e nxënësve me shami në shkolla.

“Presin që asnjë vajzë të mos pengohet që të vijojë mësimin ën shkolla vetëm pse mban shami. Premtimet e Kurtit kanë qenë edhe ndër arsyet pse kjo qeveri ka marrë një votë të madhe nga myslimanët shqiptarë. Unë kam shpresë të madhe që kjo qeveria do ta anulojë ndalesën që iu pamundëson vajzave me shami shkollimin”, deklaroi ndër të tjera imami Labinot Maliqi./Telegrafi/