Idrizovë: Fëmijët shqiptarë, kilometra rrugë për në shkollë! (Video)

Nxënësit e klasës së 6, 7, 8 dhe 9 të fshatit Idrizovë vazhdojë të udhëtojnë mbi 20 kilometra për të ndjekur mësimet nëpër shkolla tjera të Shkupit. Kjo, për shkak se shkolla fillore “Petar Petroviç Njegosh” në afërsi të vendbanimit të tyre mbyllet në mesditë dhe nuk lejon që mësimi të zhvillohet edhe në orët e pas ditës.

Prindërit, përmes televizionit Alsat-M kërkuan edhe një herë t’i jepet fund diskriminimit të nxënësve shqiptarë dhe të njëjtit të lejohen të mësojnë në këtë shkollë ku ka hapësira të mjaftueshme për ndjekjen e mësimit së bashku, me moshatarët e tyre maqedonas. Kjo sipas prindërve jo vetëm që nuk është lejuar por ka pasur edhe protesta kundër një kërkese të tillë të banorëve shqiptar.

“Një herë ka pas këtu një tubim që kisha mundur ta quaj tubim të Hitlerit, kur 2-3 mijë banorë kanë bë tubim këtu që të protestojnë kundër që fëmijët mos të mësojnë në gjuhën shqipe,mos ta ndjekin shkollën e tyre, shumë lehtë është të bëni një shkollë në Haraçinë ose në Hasanbeg, në vendet ku ka shumë shqiptarë mirëpo besoni se vlera më e madhe dhe patriotizmi me i madh kishte me qenë për një politikan kur ai do të kishte arrit sukses që të ketë shkollë në fshatin Idrizovë në gjuhën shqipe”.

“Ne të mëdhenjtë nuk dimë të shkojmë në Shkup e jo më fëmijët e vegjël. Ne jemi në punë, nuk mundemi vazhdimisht t’jku qëndrojmë pas fëmijëve. Është më mir në fshat me ndërtu shkollën”.

Disa prej prindërve thonë se janë detyruar që nxënësit t’i regjistrojnë në paralelet maqedone për shkak se nuk arrijnë të kujdesen për vajtjen-ardhjen e tyre.

“Unë i kam tash tre fëmijë që duhet me i dërguar në shkollë. Ende nuk i kam regjistruar por duhet me i regjistruar, unë dua me i regjistruar në gjuhën shqipe se ata maqedonisht nuk dinë, vështirë është. Ka shumë harxhime, nuk është vetëm puna e autobusit po janë edhe shumë gjëra tjera, pastaj po grinden në autobus, deri sa kthehen në shtëpi”.

“Për shkollë është katastrofë se shumë larg po udhëtojnë..Duhet fëmijën me sjell dhe me marrë. Për këtë do ti kisha lut politikanët që ta marrin parasysh këtë punë për të ndërtuar shkollën në fshatin Idrizovë”.

Nxënësit shqiptarë të fshatit Idrizovë dekada me radhë përballen me problemin e shkollimit në gjuhën amtare. Që dëshpërimi të jetë edhe më i madh, Ministria e Arsimit dhe Shkencës nuk jep asnjë sinjal se do gjej zgjidhje për këtë çështje të garantuar me kushtetutë. Premtimet për ndërtimin e një shkolle të re vijnë vetëm gjatë fushatës parazgjedhore të cilët zhduken me mbylljen e procesit zgjedhor. /Telegrafi/

https://www.youtube.com/watch?v=b9cxMhN-vUE