Hoxhaj: Ideja e Serbisë për treg të përbashkët rajonal, tendencë anti-europiane

Ministri i Punëve të Jashtme, Enver Hoxhaj ka ritheksuar edhe një herë se Kosova është kundër një tregu të përbashkët rajonal me iniciativë të Serbisë.

Sipas tij, idetë që vijnë nga Serbia për një treg të përbashkët janë tendenca anti-evropiane për ta dominuar rajonin dhe ndikimin rus në Ballkan, shkruan Telegrafi.

“Ideja e Serbisë për një treg të përbashkët rajonal është tendencë anti-europiane për ta çorientuar dhe dominuar rajonin, si dhe zgjatur ndikimin e Rusisë. Kosova është kundër një ‘Jugosllavie të re’, model ky që ka dështuar në të kaluarën dhe ka rezultuar në luftëra të dhunshme. Opsioni i vetëm është orientimi euroatlantik”, ka shkruar në profilin e tij, në Twitter ministri Enver Hoxhaj.

Ndryshe, presidenti në ardhje i Serbisë, Aleksandar Vuçiq gjatë një interviste ka thënë se do të thellojë lidhjet në vendet e ish-Jugosllavisë pasi ta marr postin e presidentit. Sipas tij, marrëdhëniet ekonomike janë mënyra e vetme për të kapërcyer paqëndrueshmërinë rajonale. /Telegrafi/