Hoti: LDK nuk do ta përkrahë këtë qeverisje, vendi duhet të shkojë në zgjedhje

Shefi i Grupit Parlamentar të LDK-së, Avdullah Hoti ka folur rreth ndërprerjes së seancës në mungesë të shumicës parlamentare.

Hoti përmes një postimi në Facebook ka thënë se koalicioni qeverisës asnjëherë nuk e ka pasur shumicën në Kuvend.

“Grupi Parlamentar i LDK-së nuk do të përkrahë vazhdimin e kësaj forme të qeverisjes, ku një pakicë ka uzurpuar institucionet shtetërore. Vendi duhet të shkojë në zgjedhje të reja që të mos dëmtohet demokracia”, ka shkruar Hoti.

Postimi i plotë:

Grupi Parlamentar i LDK-së
Konferencë për medie
19.07.2018

Seanca e Kuvendit të Kosovës sot u ndërpre në mungesë të shumicës parlamentare.

Në fakt, ky koalicion asnjëherë nuk ka pasur shumicë në Kuvendin e Kosovës, përveç ditës kur u zgjodh Qeveria.

Vendi nuk mund të qeveriset nga koalicioni i pakicës, i cili nuk ka legjitimitet.

Grupi Parlamentar i LDK-së nuk do të përkrahë vazhdimin e kësaj forme të qeverisjes, ku një pakicë ka uzurpuar institucionet shtetërore.

Vendi duhet të shkojë në zgjedhje të reja që të mos dëmtohet demokracia.

Gjuha e ashpër dhe fyese e koalicionit të pakicës ndaj partive opozitare e thellon më tutje krizën institucionale.

Ne ftojmë për përgjegjësi politike dhe institucionale nga të gjithë.

Ne do të punojmë me të gjitha forcat politike opozitare dhe forcat e tjera progresive në Kuvendin e Kosovës që të dalim nga kjo krizë institucionale, vetëm përmes organizimit të zgjedhjeve të lira.

Insistimi për të vazhduar me këtë dhunim të demokracisë do të dëmtojë proceset afatgjate politike në Kosovës. /Telegrafi/