​Hoti e Tërnava kërkojnë respektimin e masave antiCOVID-19 për Kurban Bajram

Kryeministri i Kosovës Avdullah Hoti, në prag të festës së Kurban-Bajramit, ka vizituar sot kreun e Bashkësisë Islame të Kosovës myftiun Naim Tërnava, pas vendimit të këtij të fundit që nesër të mos falet namazi për festën e Kurban Bajramit për shkak të gjendjes me koronavirus.

Në një konferencë për media, kryeministri Hoti ka falënderuar myftiun Tërnava për vendimin rreth pezullimit të faljes së namazit në xhamitë e Kosovës me rastin e Kurban-Bajramit dhe riteve fetare për dhjetë ditë, si pjesë e parandalimit të përhapjes së COVID-19.

Ai me këtë rast ka uruar që sa më shpejt të tejkalohet gjendja e krijuar dhe kthimin në normalitet.

“E falënderojmë në veçanti për mesazhin e qartë për të gjithë besimtarët që për këtë festë të madhe ta respektojnë vendimet e qeverisë dhe kërkesën e Bashkësisë Islame, sepse vetëm duke i bashkërenditur aktivitetet tona ne mund të kemi sukses në veprimet tona për pandeminë. Ne po bëjmë të pamundurën që të ofrojmë shërbimet për qytetarët që kanë nevojë… Ne jemi në limitet e kapaciteteve tona shëndetësore dhe e vetmja mënyrë për tejkaluar këtë situatë është ndjekja e udhëzimet e IKSHPK-së… Nesër do të bëjmë lutjet tona nëpër shtëpitë tona duke uruar që se sa më shpejt të tejkalojmë këtë situatë dhe të kthehemi në ceremonitë dhe lutjet tona të zakonshme”, tha Hoti.

Ndërsa, myftiu Tërnava tha se me kryeministrin Hoti kanë biseduar për gjendjen aktuale që ka të bëjë me virusin COVID-19 dhe mundësinë e thellimit bashkëpunimin ndërinstitucional.

Ai me këtë rast u ka bërë edhe një herë thirrje qytetarëve të Kosovës dhe në veçanti besimtarëve myslimanë që festën e Kurban-Bajramit ta kalojnë në shtëpitë e tyre, për shkak të pandemisë.

“Të gjithë qytetarët e Kosovës të respektojnë masat dhe rekomandimet e institucioneve, MSH, IKSHPK, BIK, që me qëllimin e vetëm që të mos kemi këtë numër kaq të madh të të infektuarve që ditët e fundit i kemi në Kosovë. Një respektim i këtyre masave kam bindjen e thellë se do të ulë numrin e të infektuarve në Kosovë. Duke uruar të gjithë besimtarët festën e Kurban-Bajramit, kërkoj nga të gjithë të respektohen këto masa dhe të kihen parasysh nesër, përkundër asaj që nuk do të ketë falje të namazit të Bajramit, që të qëndrojnë në shtëpitë e tyre dhe të mos shkojnë te njëri tjetri dhe të shmangen përqafimet dhe përshëndetjet me dorë, me qëllim të ruajtjes së jetës publik”, tha myftiu Tërnava. /KP/Telegrafi/