Historia e djaloshit që u qëllua me armë gjatë një loje me bashkëmoshatarët, përlot edhe Lorik Canën

Historia që e ka çelur edicionin e dytë të emisionit “Dua të të bëj të lumtur”, ka qenë ajo e Gersit, djaloshit të vogël që u qëllua me armë gjatë një loje me bashkëmoshatarët. Rasti i tij preku shumë shqiptarë të thjeshtë e personazhe të njohur, mes tyre edhe Lorik Canën.

Programi i drejtuar nga Arbana Osmani, gjatë edicionit të parë mori përsipër të gjitha operacionet për rikthimin e Gersit në gjendjen normale, por ky proces kërkon kohë.

Në studion e “Dua të të bëj të lumtur” këtë herë ishin shokët e klasës ata që e kishin ftuar Gersin, për t’i treguar se sa shumë e donin.

Miqtë zbuluan se Gersi është një nxënës i dalluar dhe një dashamirës i madh i futbollit, moment ky i cili do të kulmonte me prezencën në studio të ish-kapitenit të Kombëtares, Lorik Cana.

Cana iu bashkua idesë së “Dua të të bëj të lumtur”, duke sjellë si dhuratë për Gersin dhe miqtë e tij, uniformat e Kombëtares, topat origjinalë të firmosur prej tij dhe biletat për ndeshjen miqësore Shqipëri-Norvegji, që do të mbahet më 26 mars.

https://www.instagram.com/p/BfT3J_JjhlT

Momenti më emocionues ishte ai kur Cana i dha një mesazh të fortë për jetën Gersit, në të cilin nuk i përmbajti dot as vet lotët.

“Gjërat më të rëndësishme arrihen me forcën më të madhe, që është brenda nesh. Bukuria e vërtetë e njeriut nuk gjendet në pamjen e jashtme, por gjendet në zemrat tona”.

“Unë kam një djalë, që e quajnë Bojken. Unë dua që në të ardhmen ai të bëhet si unë dhe shpresoj që të më kalojë, por nëse do të ndjekë edhe hapat e Gersit do të isha shumë i lumtur”, është shprehur ish-futbollisti. /TopChannel/