Haxhi Shala sot del para Gjykatës Speciale

Ish-deputeti dhe ish-eprori i Ushtrisë Çlirimtare të Kosovës (UÇK), Haxhi Shala, sot pritet të dal për herë të parë para Dhomave të Specializuara, në Hagë.

Sipas një njoftimi të Dhomave të Specializuara bëhet e ditur se paraqitja e parë do të mbahet në seancë publike.

“Paraqitja e parë e Haxhi Shalës është caktuar të mbahet më 13 dhjetor 2023 në orën 14:00 në sallën e gjyqit të Dhomave të Specializuara të Kosovës (DHSK) në Hagë.

Paraqitja e parë do të mbahet në seancë publike. Gjatë paraqitjes së parë Gjykatësi i Procedurës Paraprake garanton respektimin e të drejtave të të akuzuarve, përfshirë të drejtën për përfaqësim juridik, dhe se të akuzuarit i kuptojnë akuzat e paraqitura kundër tyre”, thuhet në njoftim.

Ndryshe, Gjykata Speciale ka konfirmuar aktakuzën ndaj Haxhi Shalës, i cili po akuzohet për pengim në administrim të drejtësisë.

Lexo po ashtu Specialja publikon aktakuzën ndaj Shalës: Përmenden 200 mijë euro dhe marrëveshja me dëshmitarin për tërheqjen e dëshmisë

Ai është ekstraduar në Hagë, teksa në aktakuzën e Prokurorisë së Specializuar po thuhet se Shala, Sabit januzi dhe Ismet Bahtijari kishin zhvilluar disa takime me një dëshmitar për tërheqje të dëshmisë së tij.

Ndër të tjera, thuhet se dëshmitari tha se nëse do t’i ofronin 200 mijë euro, ata do të kishin një marrëveshje.

“Konkretisht, Januzi i tha dëshmitarit 1 se Shala i kishte kërkuar Januzit që të përcillte mesazhin se nëse dëshmitari 1 tërhiqte dëshminë e tij.

Më pas, Shala dhe persona tjerë të paidentifikuar do t’i ofronin ‘ndihmë’.

Dëshmitari 1 u përgjigj se nëse Shala dhe/ose të tjerët i sillnin 200,000 euro, ata do të kishin një marrëveshje”, thuhet në aktakuzë.

Sipas aktakuzës, më 5, 6 dhe 9 prill janë zhvilluar disa takime, teksa përmendet se Bahtijari kishte shkuar në shtëpinë e dëshmitarit. /Telegrafi/