Hamilton apo Rosberg: Si do të vendoset titulli i Formula 1 (Foto)

Ka mbetur edhe një garë për t’u zhvilluar, ndërsa Lewis Hamilton nuk po heq dorë nga lufta për titullin e Formula 1.

Piloti britanik gjendet 12 pikë prapa kolegut të tij te Mercedesi, Nico Rosberg, teksa në garë janë maksimalisht 25 pikë.

A ka gjasa Hamilton ta fitojë titullin e katërt, apo piloti gjerman tashmë e ka në dorë? Telegrafi jua sjell disa opsione se si mund të fitohet titulli.

Britaniku i ka fituar tri garat e fundit para Rosberg, por një rezultat i ngjashëm në garën e fundit do të thoshte se titulli i takon gjermanit.

Që të fitojë titullin e katërt, pas atyre në vitet 2008, 2014 dhe 2015, 31-vjeçari duhet të fitojë të dielën në Abu Dhabi dhe të shpresojë që Rosberg të përfundojë jashtë treshes së parë.

Lexo po ashtu Hamilton triumfon në garën e Brazilit, kampioni vendoset pas dy javësh mes tij dhe Rosbergut (Foto)

Nëse Hamilton zë vendin e dytë, atëherë do të duhej që Roberg të përfundonte jashtë gjashtëshes së parë. Edhe nëse e zë vendin e tretë, britaniku ka gjasa me kusht që gjermani ta mbarojë garën pas vendit të nëntë.

Çfarëdo tërheqje e kampionit në fuqi apo përfundim jashtë tri pozitave të para (ndërkohë që Rosberg e mbaron garën) ia jep automatikisht titullin shokut të tij të skuadrës, njëherësh rivalit më të madh.

Britaniku ka konkurruar për titull në garën finale në katër raste (2007, 2008, 2010 dhe 2014), ndërsa në dy prej tyre është shpallur kampion.

Me 12 pikë prapa, ai e ka shumë të vështirë, mirëpo deri më tani ka dëshmuar se mundet ta ngushtojë diferencën.

Një skenar i mundshëm është që të dy pilotë të përfundojnë me pikë të barabarta. Nëse ndodh kjo, atëherë fillimisht merret parasysh numri i garave të fituara, pastaj pozitat e dyta, për të vazhduar me pilotin që e ka zënë më së shumti vendin e tretë.

Rosberg fiton nëse:

• Zë vendin e tretë në Abu Dhabi – pavarësisht rezultatit të Hamilton
• Zë pozitat katër deri në gjashtë – kurse Hamilton përfundon në vendin e dytë apo më poshtë
• Zë vendin e shtatë apo të tetë – kurse Hamilton renditet i treti ose më poshtë
• Zë vendin e nëntë ose më poshtë – ndërsa Hamilton mbaron garën pas pozitës së katërt

Hamilton fiton nëse:

• Fiton në Abu Dhabi – kurse Rosberg e mbaron garën i katërti ose më poshtë
• Zë vendin e dytë – ndërsa Rosberg renditet i shtati ose më poshtë
• Përfundon i treti – kurse Rosberg e mbaron garën pas pozitës së nëntë

/Telegrafi/