Hamasi ka të ngjarë të emërojë liderin e ri nga jashtë Gazës

Grupi militant palestinez Hamas ka të ngjarë të zëvendësojë Yahya Sinwar me një udhëheqës të ri politik me bazë jashtë Gazës, ndërsa vëllai i tij – Mohammad Sinwar – pritet të marrë një rol më të madh në drejtimin e luftës kundër Izraelit në territor, thonë ekspertët.

Në diskutimet e tij udhëheqëse, Hamasi duhet të marrë parasysh jo vetëm preferencat e mbështetësit të tij kryesor – Iranit – por edhe interesat e shtetit arab të Gjirit të Katarit, ku aktualisht banojnë të gjithë kandidatët kryesorë për të marrë postin e shefit të Byrosë Politike.

Bëhet e ditur se Sinwar, organizatori i sulmit të 7 tetorit të vitit 2023 që ndezi luftën shkatërruese të Gazës, u vra nga forcat izraelite në një përleshje me armë – hera e dytë në më pak se tre muaj që Hamasi humb liderin e tij më të lartë.

Shefi i tij i mëparshëm, Ismail Haniyeh, u vra në Iran në korrik.

Kur Sinwar e zëvendësoi atë, ai shkriu së bashku udhëheqjen ushtarake dhe politike në Gaza, por kjo nuk duket e mundshme këtë herë, shkruan Reuters, përcjell Telegrafi.

Pas më shumë se një viti sulmesh izraelite që kanë goditur Hamasin, kanë vrarë mijëra luftëtarë të tij dhe kanë eliminuar figura të larta brenda dhe jashtë Gazës, nuk është e qartë se si do të dalë grupi nga kjo goditje e fundit.

Zëvendësi i Sinwar, Khalil Al-Hayya, i cili shihet si një pasardhës i mundshëm, së fundmi deklaroi se pengjet izraelite nuk do të kthehen derisa trupat izraelite të tërhiqen nga Gaza dhe të përfundojë lufta.

Siç raportohet, Hamasi ka një histori të zëvendësimit të shpejtë dhe efikas të liderëve të tij të rënë, me organin e tij më të lartë vendimmarrës, Këshillin Shura, i ngarkuar me emërimin e një kreu të ri.

Këshilli Shura përfaqëson të gjithë anëtarët e Hamasit në Rripin e Gazës, Bregun Perëndimor, burgjet izraelite dhe diasporën palestineze, që do të thotë se lideri i ri duhet të ketë autoritetin për të hyrë në bisedimet e armëpushimit edhe nëse nuk është në Gaza, ku persona të armatosur të Hamasit ende mbajnë dhjetëra izraelitët peng.

Përveç Hayya, i cili është kryenegociatori i Hamasit, pretendentët e tjerë kryesorë të lidershipit janë Khaled Meshaal, paraardhësi i Haniyeh dhe Mohammad Darwish, një figurë pak e njohur që kryeson Këshillin Shura, sipas analistëve dhe një burimi të Hamasit.

Por, Hamasi do të duhet të njoftojë Katarin, i cili ka luajtur një rol të madh në raundet e bisedimeve të deritanishme të armëpushimit, dhe kryeqytetet e tjera rajonale përpara vendimit të tij, sipas burimit. /Telegrafi/