Hamasi dhe Fatah bien dakord për një komitet të përbashkët për të udhëhequr Gazën e pasluftës

Lëvizja palestineze Hamas dhe partia Fatah e presidentit palestinez Mahmud Abbas kanë rënë dakord të krijojnë një komitet për të drejtuar bashkërisht Gazën e pasluftës, thanë të martën negociatorët nga të dyja palët.

Sipas planit, i cili ka nevojë për miratimin e Abbas, komiteti do të përbëhet nga 10 deri në 15 figura jopartiake me autoritet mbi çështjet që lidhen me ekonominë, arsimin, shëndetin, ndihmën humanitare dhe rindërtimin, sipas një drafti të propozimit të parë nga AFP, përcjell Telegrafi.

Pas bisedimeve në Kajro të ndërmjetësuara nga Egjipti, dy fraksionet rivale ranë dakord që komiteti do të administronte anën palestineze të pikës së kontrollit Rafah në kufirin me Egjiptin – i vetmi vendkalim i territorit që nuk ndahet me Izraelin.

Delegacioni i Fatahut, i udhëhequr nga anëtari i komitetit qendror të partisë Azzam al-Ahmad, do të kthehej të martën në Ramallah për të kërkuar miratimin përfundimtar të Abbasit, thanë negociatorët nga të dyja palët për AFP.

Delegacioni i Hamasit drejtohej nga anëtari i Byrosë Politike Khalil al-Hayya.

Nisma vjen në një kohë të përpjekjeve të përtërira diplomatike për t’i dhënë fund luftës së Gazës, e cila u ndez nga sulmi i paprecedentë i Hamasit në Izrael më 7 tetor 2023.

Këto përpjekje, të udhëhequra nga Shtetet e Bashkuara së bashku me Egjiptin, Katarin dhe Turqinë, vijnë gati një javë pasi një armëpushim i brishtë midis Izraelit dhe Hezbollahut hyri në fuqi në Liban.

Hamasi dhe Fatah kanë qenë rivalë të ashpër që kur luftëtarët e Hamasit e dëbuan Fatahun nga Rripi i Gazës pas përleshjeve vdekjeprurëse që pasuan fitoren jetike të Hamasit në zgjedhjet e vitit 2006.

Hamasi mori kontrollin e Gazës në vitin 2007, ndërsa lëvizja laike Fatah kontrollon Autoritetin Palestinez dhe ka kontroll të pjesshëm administrativ në Bregun Perëndimor të pushtuar nga Izraeli. /Telegrafi/