Trajneri i skuadrës të të rinjve të Real Madridit, Jose Maria Guti, i njohur vetëm si Guti beson se sulmuesi i Paris Saint-Germain, Neymar duhet të shkojë në Santiago Bernabeu për të vazhduar përmirësimin e tij.
Sulmuesi brazilian i la rivalët e Barcelonës në verën e kaluar për një shifër rekord botëror të transferimeve prej 222 milionë eurosh.
Por, që nga transferimi i tij në Parc des Princes, Neymar ka qenë i lidhur me një lëvizje të ardhshme tek rivalët e urryer të Barcelonës, Reali.
Shumë futbollistë dhe drejtues kanë folur rreth këtij transferimi, ndërsa i fundit është ish-ylli i Realit, Guti, i cili ka thënë se braziliani duhet të bashkohet me Mbretërit.
Neymar (Getty Images)
"Unë besoj se Neymar duhet të bashkohet me Madridin", ka thënë fillimisht Guti për mediumin Cadena Ser.
"Ne me të vërtetë e shohim atë vetëm në Ligën e Kampionëve pavarësisht se është në një klub të rëndësishëm në Paris Saint-Germain, por nuk është njësoj si kur ai ishte në Barcelonë".
"Nëse ai dëshiron të përmirësohet si një lojtar dhe të mbajë karrierën e tij në një trajektore në rritje, e vetmja mundësi për të është që të bashkohet me Madridin", përfundoi legjenda e Realit.
Ndryshe, ylli brazilian po përjeton një sezon fantastik me PSG-në ku në 29 paraqitje në të gjitha garat ka shënuar plot 28 gola. /Telegrafi/
