Grabitje e armatosur në një bankomat afër “Hib Petrol” në Ferizaj, grabitësit gjuajnë me armë në drejtim të policisë

Një grabitje e armatosur ka ndodhur sot rreth orës 04:50 nga disa persona të panjohur në magjistralen Ferizaj-Prishtinë në një bankomat afër pikës së karburantit “Hib Petrol” në Ferizaj.

Lajmin për Telegrafin e ka konfirmuar zëdhënësi i Policisë së Kosovës për rajonin e Ferizajt, Kanun Veseli.

Sipas tij, sapo ka arritur në vendngjarje policia, të dyshuarit kanë filluar që të shtinë me armë zjarri në drejtim të veturës së policisë, duke dëmtuar në masë të madhe veturën zyrtare, mirëpo dy policët që ishin në veturë nuk kanë pësuar ndonjë lëndim.

Veseli po ashtu bëri të ditur se të dyshuarit kanë arritur të largohen nga vendi i ngjarjes me një veturë në drejtim të panjohur.

Po ashtu siç bëri të ditur Veseli në veturë dyshohet se ishin katër persona me armë të gjata.

“Sot rreth orës 04:50 kemi pranuar një informatë se në rrugën magjistrale Ferizaj-Prishtinë tek pika e karburantit “Hib Petrol” në Ferizaj ishte një grabitje e armatosur në proces nga persona të panjohur.

Patrulla e policisë me të arritur në vendin e ngjarjes, të dyshuarit kanë filluar të shtënë me armë zjarri në drejtim të veturës së policisë, duke dëmtuar në masë të madhe veturën zyrtare, mirëpo dy policët që ishin në veturë nuk kanë pësuar ndonjë lëndim, ndërsa shkëmbim zjarri kishte edhe nga ana e zyrtarëve policor, mirëpo të dyshuarit kanë arritur të largohen nga vendi i ngjarjes me një veturë dyshohet karavan ngjyrë teget,  në drejtim të panjohur dhe në veturë dyshohet se ishin 4 persona me armë të gjata”, tha Veseli.

Ai po ashtu theksoi se ekipet e policisë menjëherë kanë dalë në vendin e ngjarjes në asistim të patrullës së policisë.

“Për informata tjera ju njoftojmë me kohë. Rasti është cilësuar ‘Tentim vrasje, Shkaktim i rrezikut të përgjithshëm dhe grabitje e armatosur’ “.

Siç mëson Telegrafi grabitësit kanë dëmtuar bankomantin e TEB-it. /Telegrafi/