Grabitja e armatosur në Suharekë, fillon operacioni i gjerë për kapjen e katër të dyshuarve

Pasditen e së mërkurës ka ndodhur një grabitje e armatosur në një argjendari në qytetin e Suharekës. Në tentativën për ta parandaluar grabitjen, grabitësit kanë plagosur në këmbë një polic të Kosovës.

Shaqir Bytyqi, zëdhënës i Policisë për rajonin e Prizrenit, ka thënë se ka filluar një operacion i gjerë për kapjen e katër personave të dyshuar.

Ai tha se hetimet janë duke vazhduar dhe se pritet që të dyshuarit të kapen nga policia.

Lexo po ashtu Grabitje e armatosur në një dyqan në Suharekë – plagoset zyrtari policor

“Patrullat tjera janë nisur menjëherë në vend të ngjarjes janë duke nxjerrë provat apo dëshmitë nga vendi, janë intervistuar dëshmitarët. Është ngritur “unaza e çeliktë”, një operacion kur ka grabitje apo raste të rënda. Një prej operacioneve më të gjera është urdhri për ‘unazën e çeliktë’ e cila urdhëron të gjitha patrullat e policisë të angazhohen në rastin konkret. Është shumë herët të flasim kush janë të dyshuarit. Hetuesit po marrin informacione të shihen videoincizimet, shumë shpejt mund të merren informacione që t’i gjejmë”, tha ai, raporton RTV Dukagjini.

Në vendin e ngjarjes ka dalur edhe ekipi i forenzikës dhe ekipet e tjera për ta hetuar rastin. /Telegrafi/