Gjykimi për krime lufte i Dragisha Milenkoviqit, dëshmitari Ramadani: Kokën e kam të çarë nga maltretimet

Në Gjykatën e Prishtinës është mbajtur seanca ndaj Dragisha Milenkoviqit, i akuzuar për krime lufte në Kosovë.

Ai u përball me dëshminë e dëshmitarit Agron Ramadani, i cili para Gjykatës dha detaje të arrestimit të tij, burgjet në të cilat ka qenë, e maltretimet që i kishte përjetuar në Burgun e Prishtinës dhe Lipjanit.

Dëshmitari tha se ishte arrestuar  më 11.06.1998 dhe pastaj ishte dërguar në Burgun e Prishtinës në qelinë numër 1. Para hyrjes në këtë qeli ai tha se ishte maltretuar fizikisht për 30 minuta nga i akuzuari dhe dy persona tjerë: Zoran Koliq dhe Bradiq. Dëshmitari për këtë të fundit tha se nuk i kujtohej nëse ishte emër apo mbiemër.

“Pas tre ditësh (pas arrestimit) më kanë dërguar në Burgun e Prishtinës i cili është afër atë kohë me Zyrat e Sigurimit Shtetëror të Serbisë. Ashtu është thirr atëherë. Pas dërgimit poshtë në qeli numër 1, para derës së qelisë më kanë maltretuar fizikisht për 30 minuta. Ata kanë qenë Dragisha Milenkoviq, Bradiq nga Obiliqi,  dhe Zoran Koliq”,  tha dëshmitari para Gjykatës.

Ai tha se qelia ka qenë përgjysmë me ujë dhe aty ka qëndruar për 10 apo 15 ditë, kurse maltretimet ai u quajti “shtazarake”.

Përveç përjetimeve në Burgun e Prishtinës ai foli edhe për përjetimet që i kishte pasur në Burgun e Lipjanit, në të cilin tha se kishte dëgjuar që kishte vdekur një njeri për shkak të maltretimve, por sot e asaj dite nuk e di për kë është fjala.

“Në burgun e Lipjanit kemi qenë 5 -6 vetë në një dhomë ashtu siç kemi mundur. Aty kemi dëgjuar britma në dhoma të tjera, dhe kemi dëgjuar që nga rrahjet një i burgosur ka vdekur. Në dhomën tonë, në katin e parë ku isha unë, ka hyrë një polic, i uniformuar dhe na ka pyetur: “A ka ndonjë të burgosur nga Drenica, dhe nga Fushë-Kosova?”.  Askush nuk është përgjigjur. Ai u prezantua si Ilija nga Fushë-Kosova. Ka qenë i vjetër në moshë. Mbi 50-vjeç, afër. Në Burgun e Lipjanit sa kemi qëndru aty, ushqimi ka qenë ekstrem në mungesë, aty as bukë apo një bukë e kemi nda në 12 deri 13 pjesë. Kështu ka qenë gjendja në burgun e Lipjanit”, shtoi tutje ai.

Dëshmitari theksoi se në Burgun e Lipjanit kishte qëndruar dy herë; një herë para se ta dërgonin në Burgun e Dubravës dhe një herë pasi ishte transferuar nga ai i Dubravës në të Lipjanit.

Ai dha detaje edhe për rrugën që e kishte kaluar gjatë transferimit, arsyet e transferimit dhe dhunën që e kishte përjetuar.

“Kur na kanë kthy nga Burgu i Dubravës pasi ishte bombarduar, aty ishin zhvillu vrasje, masakra, aty nuk kishte kushte me qëndru në atë burg, dhe na kanë transferu në Burgun e Lipjanit. Në Burgun e Lipjanit aty na kanë pritë një kordon nga dy anët policë dhe gardianë të burgut të Lipjanit dhe gardianë që kishin ardhur nga burgjet e tjera të Serbisë, pasi që kemi zbrit prej autobusëve aty kanë fillu torturat, rrahjet, derisa kemi hy në pavijonet apo dhomat e Burgut të Lipjanit”, u shpreh ai para Gjykatës.

Ai tha se edhe sot e ka kokën e çarë nga maltretimet në këto dy burgje.

Ai tha se ishte arrestuar për shkak që kishte qenë një nga themeluesit e UÇK-së, dhe se para arrestimit të tij ishte truproje e Adem Demaçit, dhe veprimtaria e tij ishte pjesa informative përmes Demaçit dhe zonave të luftës të UÇK-së .

“Në atë kohë para arrestimit kam qenë truproje apo shef i sigurisë së Adem Demaçit. Veprimtaria ime ishte pjesa informative përmes Demaçit dhe zonave të luftës të UÇK-së“- u shpreh dëshmitari Ramadani.

Milenkoviq po akuzohet se në luftën e fundit, në vitin 1999, në cilësinë e personit zyrtar në Burgun e Prishtinës dhe Lipjanit ka kryer veprime të cilat cilësohen si krime lufte ndaj popullatës civile

Ai ishte arrestuar nga Policia e Kosovës më 21.06.2023, e për arrestimin e tij ishte protestuar në Graçanicë.

Milenkoviq ishte sjellë më 22.06.2023 para Gjykatës së Prishtinës dhe ndaj tij ishte caktuar masa e paraburgimit.

Milenkoviq akuzohet se pasi që janë transferuar të burgosurit nga Burgu i Dubravës në Burgun e Prishtinës dhe Lipjanit i ka detyruar të burgosurit të kalojnë përmes një kordoni dhe të njëjtit i kishte goditur me shkop, grushte dhe shqelma.

Sipas dosjes së Prokurorisë, të burgosurit në mënyrë sistematike ishin trajtuar në mënyrë çnjerëzore, duke u torturuar, maltretuar, kanosur me jetë e kështu duke iu shkaktuar lëndime të rënda trupore dhe pasoja në shëndet.

Përveç kësaj, mbi të burgosurit sipas dosjes së Prokurorisë ishte ushtruar edhe dhunë psikike.

Këto veprime, Milenkoviq akuzohet se i ka kryer në bashkëpunim me tre zyrtarë të tjerë ndër të cilët ish-drejtori i Burgut të qarkut të Prishtinës, Lubomir Cimburoviq, si dhe gardianët Predrag Bradiq dhe Milivoje Iliq.

Sipas prokurorit Atdhe Dema, këto veprime janë në kundërshtim me Konventën Ndërkombëtare të Gjenevës.

Trupi gjykues i cili po gjykon këtë çështje përbëhet nga Kujtim Krasniqi – kryetar, dhe anëtarët Mentor Bajraktari e Arben Hoti. /Kallxo.com/