Për të dytën herë me radhë seanca gjyqësore ndaj Thaçit dhe të tjerëve ka shkuar në pauzë.

Gjykatësi Charles Smith tha se do bëjnë pushim deri në orën 14:30. Duhet theksuar se transmetimi për publikun bëhet me 45 minuta vonesë.

Seanca do të rinis sërish pas pauzës.

Dëshmitarja e parë ka dhënë dëshminë e saj gjatë tërë kohës në seancë të mbyllur. /Telegrafi/

Pas pauzës ka rifilluar sërish seanca gjyqësore ndaj katërshes së UÇK-së.

Dëshmitarja e parë është duke vazhduar të japë dëshminë në seancë të mbyllur për publikun.

Deri më tani seanca është duke vazhduar të mbahet në këtë mënyrë. /Telegrafi/

Dëshmitarja e parë e Prokurorisë në Dhomat e Specializuara ka dhënë dëshminë e saj për shumë se dy orë në seancë të mbyllur për publikun.

E pas kësaj është ndërprerë përkohësisht seanca gjyqësore për një pauzë.

Gjykatësi njoftoi se gjatë kësaj jave do të dëgjohen dëshmitë e dy dëshmitarëve, ku fillimisht do të ketë mundësi Prokuroria të parashtrojë pyetje, e pastaj mbrojtja.

Ish-krerët e UÇK-së ndodhen në qendrën e paraburgimit në Hagë prej nëntorit të vitit 2020. Të hënën e kaluar 3 prill ka nisur gjykimi. /Telegrafi/

Dëshmia e dëshmitares së parë në rastin Thaçi dhe të tjerët është duke vazhduar në seancë të mbyllur tash e gati një orë.

Në seancën ku po mbahet gjykimi janë të pranishëm edhe ish-krerët e UÇK-së, Hashim Thaçi, Kadri Veseli, Jakup Krasniqi e Rexhep Selimi.

Seanca gjyqësore pritet të ketë më 12 dhe 13 prill. Seanca pritet të ketë më pas më 17, 18, 19 dhe 20 prill. /Telegrafi/

Dëgjimi i dëshmitares së parë kundër ish-krerëve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi e Rexhep Selimi po zhvillohet në seancë private.

Lidhur me këtë është shprehur i revoltuar ushtruesi i detyrës së kryetarit të Organizatës së Veteranëve të Luftës së UÇK-së, Faton Klinaku.

“Pak po iu duket që i fshehët fytyra dhe zëri dëshmitares, veç edhe kalojnë në seancë edhe më private”, ka shkruar Klinaku në rrjetin social Facebook.

Në Hagë tashmë ka nisur seanca e re gjyqësore ndaj ish-krerëve të UÇK-së.

Në këtë seancë ka nisur dëshminë dëshmitarja e parë e Prokurorisë në Dhomat e Specializuara.

Dëshmia e saj po zhvillohet në seancë të mbyllur për publikun, kjo me kërkesë të Prokurorisë.

Lluka Mishetiq, avokati i ish-kreut të Ushtrisë Çlirimtare të Kosovës, Hashim Thaçi, i ka kërkuar 14 orë kohë që t’i parashtrojë pyetje dëshmitares. /Telegrafi/

Avokati Tomë Gashi ka thënë se Gjykata Speciale nuk është e Kosovës.

Ai në një postim në Facebook, ka shkruar se kjo gjykatë fatkeqësisht ka qenë vetëm një ditë gjykatë e Kosovës, ditën kur është votuar ligji për të më 3 gusht 2015.

“Përveq që nuk ka asnjë shenjë të Republikës së Kosovës, për t’i hyrë në hatër Serbisë, kjo gjykatë haptazi nuk po e respekton asnjë ligj të Kosovës, pasi që sot është duke mbajtur gjykimin në rastin e z.Thaçi, Veseli, Krasniqi e Selimi”, ka shkruar Gashi.

Avokati ka shtuar se në këtë rast janë së paku dy të këqija.

“1 që Gjykata Speciale po mban gjykim në ditë feste dhe 2 që ne po festojmë tepër shumë dhe po punojmë tepër pak”, ka shkruar Gashi. /Telegrafi/

Në Dhomat e Specializuara të Kosovës në Hagë është paraqitur dëshmitarja e parë në rastin Thaçi dhe të tjerët.

Seanca ka kaluar në private me të nisur dëshminë ajo, identiteti i së cilës nuk është zbuluar nga Zyra e Prokurorit të Specializuar.

Gjykatësi Charles Smith III i ka sqaruar dëshmitares së mbrojtur të gjitha procedurat e dëshmisë.

“Ju nuk guxoni të flisni me askënd rreth dëshmisë tuaj. Nëse vjen dikush ju pyet, ju lutem na tregoni”, ka thënë gjykatësi.

Ai gjithashtu ka bërë të ditur se nga e marta deri të enjten do të dëgjohen dy dëshmitarë.

Në Hagë ka nisur gjykimi ndaj ish-krerëve të UÇK-së.

Në gjykimin e sotëm do të paraqitet dëshmitari i parë i Prokurorisë së ZPS-së.

Gjykatësi Çarls Smith ka bërë të ditur se nga sot deri të enjten do të dëgjohen dy dëshmitarë.

“Sot do të fillojmë seancën me dëshmitarët e prokurorisë. Gjatë këtyre ditëve do të dëgjojmë dy dëshmitarë të prokurorisë”, tha Smith.

Ai bëri të ditur se pritet të ketë edhe disa redaktime gjatë seancës së sotme. /Telegrafi/