Gjuha e tij është bërë e gjelbër dhe me qime – cili është shkaku i kësaj gjendjeje të rrallë mjekësore?

Higjiena orale është jashtëzakonisht e rëndësishme dhe ky rast është një tjetër dëshmi e kësaj

Ishte mëngjes dhe një burrë 64-vjeçar u ngrit dhe shkoi të lante dhëmbët. Megjithatë, pasi vendosi pastën e dhëmbëve në furçë dhe hapi gojën, vuri re diçka të pazakontë në gjuhën e tij – qime me ngjyrë të gjelbër. Ndonëse i habitur nga ajo që pa, ai vendosi të mos bënte panik, por pas dy javësh nuk mund ta shpërfillte më problemin e tij dhe vendosi të shkonte për vizitë te mjeku.

Në ordinancën e tij, mjeku ekzaminoi historinë e tij mjekësore, terapitë e mëparshme që kishte marrë dhe arriti në përfundimin se ishte një infeksion mykotik i shkaktuar nga marrja e antibiotikëve që i ishin përshkruar për infeksionin e mishrave të dhëmbëve. Ai tani ka përshkruar një antimykotik dhe është dërguar në shtëpi. Surpriza erdhi në kontrollin kur mjeku zbuloi se rritja e ngjashme me mykotikun nuk ishte reduktuar aspak.

Gjatë ekzaminimit, mjeku kuptoi se zgjatimet e vogla të pacientit në sipërfaqen e gjuhës ishin krejt të ndryshme nga ato të zakonshmet. Duke qenë se nuk kishte simptoma të tjera të raportuara prej tij, u vendos diagnoza përfundimtare – “gjuhë me qime”, transmeton Telegrafi.

Çfarë është gjuha leshtore?

Emri teknik për gjendjen është lingua villosa dhe pavarësisht se duket e frikshme, është e padëmshme. Shkakton që në majë të gjuhës të rriten qime me ngjyra të ndryshme që nuk mund të hiqen nga sipërfaqja me furçë – siç ndodh me disa sëmundje të tjera. Ato mund të rriten deri në 18 mm përpara se të bien, dhe sipas disa vlerësimeve, ndodhin në 13 për qind të njerëzve.

Problemi lind kur copa ushqimi vendosen midis qimeve dhe bakteret shumohen dhe u japin qimeve një ngjyrë specifike – kafe, të bardhë, jeshile apo edhe rozë. Konsumimi i alkoolit, çajit, kafesë, ushqimeve të buta, pirja e duhanit, dehidratimi, higjiena e dobët e gojës dhe përdorimi i disa medikamenteve renditen si faktorë rreziku për zhvillimin e qimeve në gjuhë.

Por mjekët e kanë një zgjidhje: “furça” e rregullt e gjuhës mund të parandalojë shfaqjen e tyre. Çfarë ndodhi me pacientin? Në një raport të botuar në “New England Journal of Medicine”, mjekët shkruan si vijon: “Pas 6 muajsh përkujdesje, pamja e gjuhës u kthye në normalitet pavarësisht se pacienti vazhdonte të pinte duhan”. /Telegrafi/