Gjashtëvjeçari shpëtoi motrën nga sulmi i një qeni dhe përfundoi me 90 qepje në fytyrën e tij

Një djalë gjashtë vjeçar nga Wyoming, SHBA, po konsiderohet si hero nga familja e tij pasi ai mbrojti motrën e tij të vogël nga një sulm i një qeni dhe përfundoi duke pasur nevojë për 90 qepje në fytyrën e tij.

Sipas mediave të huaja, përcjell Telegrafi, ka qenë halla e Bridger Walker, Nikki Walker, ajo që ka ndarë detajet e sulmit, përmes një postimi në Instagram.

Ajo shkruajti më 9 korrik se Bridger pa qenin që i afrohej motrës së tij dhe me qëllim qëndronte para saj.

Qeni e sulmoi Bridgerin në vend të saj, duke kafshuar anën e fytyrës dhe kokës së djalit, tha ajo.

“Nipi im është një hero që shpëtoi motrën e tij të vogël nga një qen sulmues. Ai, vetë, mori përsipër sulmin në mënyrë që qeni të mos merrte motrën e tij”, lexohet në krye të postimit në Instagram.

Madje, pavarësisht se u plagos, Nikki tha që Bridger kapi dorën e motrës së tij dhe vrapoi me të “për ta mbajtur të sigurt”.

Postimi në Instagram i Nikki përfshinte fotografi të fëmijëve pas sulmit, me mavijosje dhe qepje të shumta nëpër fytyrën e tij.

Nikki tha se kur ajo e pyeti Bridger-in pse ai i doli përpara qenit, ai i tha asaj: “Nëse dikush do të vdiste, unë mendova se duhet të isha unë”.

Nikki tha që Bridger u trajtua nga një “kirurg plastik i aftë” pas sulmit dhe tani po rimëkëmbet në shtëpi. /Telegrafi/