Një hap i rëndësishëm për forcimin e bashkëpunimit ekonomik mes Gjermanisë dhe Kosovës është bërë sot me nënshkrimin e një Memorandumi Mirëkuptimi ndërmjet GIZ dhe Odës Ekonomike Gjermano-Kosovare (OEGJK).
Ky dokument e konsolidon një marrëdhënie të ndërtuar ndër vite, duke i dhënë asaj një dimension të ri strategjik.
OEGJK, që mbetet platformë përfaqësuese e bizneseve gjermane dhe ndërkombëtare në Kosovë, vazhdon të luajë rol kyç në forcimin e lidhjeve ekonomike dhe krijimin e urave të bashkëpunimit me institucionet vendore.
Për shumë vite, GIZ ka qenë partner thelbësor, duke mbështetur iniciativa që synojnë përmirësimin e klimës së biznesit dhe zhvillimin e qëndrueshëm të sektorit privat në Kosovë.
Me këtë partneritet të ri strategjik, palët synojnë të zgjerojnë shërbimet për anëtarët e OEGJK-së, të nxisin iniciativa të reja ekonomike, si dhe të forcojnë dialogun e strukturuar mes sektorit privat dhe institucioneve publike.
Nënshkrimi i Memorandumit u realizua gjatë vizitës në Kosovë të Dr. Micong Klimes, përfaqësuese e Ministrisë Federale Gjermane për Bashkëpunim Ekonomik dhe Zhvillim (BMZ).
Gjatë vizitës u zhvilluan takime me institucione gjermane dhe partnerë afatgjatë të bashkëpunimit gjermano-kosovar, duke reflektuar rëndësinë e rritur të këtij partneriteti për zhvillimin ekonomik të vendit./Telegrafi/
