Gazetarja rrezikoi jetën e saj duke shkruar për coronavirusin në Wuhan të Kinës, tani ajo mund të mos i mbijetojë burgut

Në ditët e para të pandemisë së coronavirusit, kur qeveria kineze u përpoq të frenonte përhapjen e virusit, raportimi për situatën me infeksionet në vend nuk tolerohej tepër.

“Është ora 00:40 e mëngjesit, dëgjohet zhurma e krematoriumit. Ata punojnë ditë e natë”, tha Zhang Zhan në një video të shkurtit 2020, një nga dhjetëra që ajo postoi në YouTube.

Në maj, ajo komentoi për NBC News se “çdo gjë është mirë tani për tani” dhe se ajo nuk u arrestua.

“Unë nuk jam arrestuar. Megjithatë, nuk e di se çfarë do të ndodhë nëse vazhdoj”, tha Zhan në atë kohë.

Por Zhang u zhduk atë muaj.

Avokati i saj më vonë konfirmoi për NBC se ajo u dënua me katër vjet burg në një gjykatë të Shangait në dhjetor për “shkaktim telashesh”.

Dhe siç shkruajnë mediat e huaja, përcjell Telegrafi, ajo është një nga të paktën 10 gazetarët dhe komentuesit që u përpoqën të ushtronin presion ndaj autoriteteve kineze në ditët e para të pandemisë për të qenë më transparente dhe që më vonë u arrestuan.

Edhe pse shumë të tjerë janë liruar që atëherë, Zhang është ende në burg dhe familja dhe miqtë e saj kanë frikë se ajo mund të vdesë nga një grevë urie.

“Ajo qëndron për të vërtetën, ajo qëndron për drejtësinë. Dhe ajo përfaqëson më të mirën e Kinës”, ka thënë aktivistja me qendër në Mbretërinë e Bashkuar, Jane Wang, e cila po bën fushatë për lirimin e gazetares.

Ndërkohë vëllai i Zhan, Zhang Ju, shkroi në Twitter në tetor se motra e tij tani peshon më pak se 41 kilogramë.

“Ata mund të mos i mbijetojnë dimrit të ftohtë që po vjen”, citohet të ketë thënë ai.

Zhang, një ish-avokate, ishte e njohur për autoritetet kineze edhe para raportit të saj për pandeminë.

Në shtator të vitit 2019, ajo mori pjesë në protesta pro-demokracisë dhe bëri thirrje për heqjen e monopolit të Partisë Komuniste.

Autoritetet e ndaluan dhe ajo kaloi më shumë se dy muaj në burg. Edhe atëherë ishte në grevë urie. /Telegrafi/