Gashi: Investitorët nuk do të ballafaqohen më me pengesa

Zëvendëskryeministri/ministri i Diasporës Dardan Gashi ka deklaruar se Konferenca Ekonomike e Diasporës Shqiptare, që po mbahet në Kosovë, është shembulli më i mirë për ta dëshmuar mbështetjen që Qeveria e Kosovës dhe Ministria e Diasporës dhe Investimeve Strategjike u jep investitorëve dhe bizneseve nga Diaspora.

Në Gala Darkën e organizuar nga MDIS dhe Rrjeti i Bizneseve Shqiptare të Diasporës, ministri Gashi ka thënë se tani është koha që ndërmarrësit të kenë hapësirën dhe mbështetjen e duhur në Kosovë.

Ai i ka falënderuar ata për kontributin që kanë dhënë në vazhdimësi për vendlindjen e tyre.Zëvendëskryeministri ka vlerësuar si sukses të jashtëzakonshëm nënshkrimin e marrëveshjes për Parkun e Biznesit në Malishevë.

Zëvendëskryeministri i Republikës së Kosovës, Dardan Gashi njëherit ministër i Diasporës dhe Investimeve Strategjike, tha se si Qeveri e Kosovës kanë vendosur të lëvizin nga fjalët në vepra konkrete dhe sot do të nënshkruhen marrëveshje me Unionin e Bizneseve të Gjermanisë, për t’iu dhënë në dispozicion bizneseve të diasporës Parkun e bizneseve të Malishevës, me afro 80 hektarë.