Gara shpejtësie në rrugën Tiranë-Durrës, policia publikon pamjet e kapjes së drejtuesit të mjetit

Policia e Shtetit ka publikuar pamjet e ndalimit të shtetasit L.G., drejtuesi i një automjeti të markës “BMW”, në segmentin rrugor Tiranë-Durrës pasi është kapur në shkelje të rregullave të qarkullimit.

Sipas policisë, drejtuesi i mjetit kishte kryer manovra të rrezikshme dhe gara shpejtësie në rrugën Tiranë-Durrës duke rrezikuar jetën e përdoruesve të rrugës.

Shtetasi është identifikuar dhe bllokuar nga Policia Rrugore e Tiranës, si dhe është ndëshkuar me masë administrative 40,000 lekë [325 euro].

Gjithashtu, gjatë 72 orëve të fundit, policia ka evidentuar dhe ndëshkuar me gjoba prej 40.000 lekësh edhe 14 drejtues mjetesh të tjerë që kryenin gara shpejtësie e manovra të rrezikshme në rrugë.

“Policia Rrugore e Tiranës apelon për të gjithë përdoruesit e rrugës për zbatim me rigorozitet të rregullave të qarkullimit rrugor dhe fton qytetarët, që të denoncojnë në 112 e Komisariatin Dixhital çdo shkelje të rregullave të qarkullimit rrugor”, ka shtuar policia. /Telegrafi/