Futbollistët e Gremios dalin me maska në fushë në shenjë proteste, përkundër virusit vazhdojnë ndeshjet të zhvillohen në Brazil

Futbolli në Brazil vazhdon të luhet, përkundër se edhe në këtë shtet është përhapur pandemia coronavirus.

Deri më tani 200 raste janë shënuar të infektuar me coronavirus në këtë shtet, por që fatmirësisht asnjë nuk ka ndërruar jetë.

Edhe përkundër përhapjes së virusit, federata braziliane e futbollit nuk e ka ndalur aktivitetin pasi ndeshjet po luhen rregullisht, por pa praninë e tifozëve.

Skuadra e madhe braziliane Gremio ishte nikoqire e Sao Luiz në kuadër të javës së tretë dhe që përfundoi me fitoren e vendasve 3-2.

Futbollistët e Gremios dolën në fushë me maska në fytyrë në shenjë proteste ndaj Federatës së Futbollit dhe shtetit brazilian për mos anulimin e ndeshjeve.

Pas përfundimit të ndeshjes presidenti i klubit, Romildo Bolzan ka thënë se dalja në fushë e futbollistëve të tij me maska ishte një shenjë proteste.

“Jeta e futbollistëve dhe të gjithëve është më e rëndësishme se futbolli. Mendoj se duhet të pezullohet përkohësisht kampionati, por kështu nuk po mendon shteti dhe federata”, deklario Bolzan.

Gjithsesi përveç Brazilit edhe në disa vende të Evropës nuk po ndalet futbolli, por që po luhet pa tifozë.

Turqia, Rusia dhe Hungaria janë tri vendet që kanë luajtur normalisht këtë fundjavë futboll. /Telegrafi/