Superliga e Kosovë e ka mbyllur edicionin e rregullt me Feronikelin që është shpallur kampion.
Prishtina e zuri vendin e dytë, ndërsa Llapi vendin e tretë në një kampionat që deri në xhiron e fundit doli i luftuar.
Formacioni i zgjedhur nga redaksia e Telegrafi Sport, ka pesë lojtarë të Feronikelit, katër te Prishtinës dhe dy të Llapit.
Edhe pse ka pasur paraqitje individuale të mira të lojtarëve nga tjerat klube, këta lojtar ishin më të mirët dhe vendimtar në shumicën e ndeshjeve për skuadra e tyre.
Formacioni ka vendosjen 4-2-3-1, pasi edhe shumica e klubeve në Kosovë luajnë në këtë sistem.
Visar Bekaj
Në portë pa dyshim më i miri ishte Visar Bekaj i Prishtinës. 12 gola të pranuar në 33 ndeshje tregon që ai ishte në formë të lartë këtë vit.
Prishtina asnjëherë nuk kishte pranuar më pak gola në histori të klubit në një edicion.
Armend Thaqi
Krahun e djathtë e fiton Armend Thaqi. 33 ndeshje, 4 gola dhe 8 asistime. Shifra për një sulmues.
Vrapime dhe depërtime pa fund gjatë gjithë edicionit. Pika më e fortë e Prishtinës që doli e dyta.
Ai e fitoi vendin në një konkurrencë të fortë me Përparim Islamin, që po ashtu kishte një edicion të madh.
Arbër Prekazi
Lideri i Feronikelit. Së bashku me Lapidar Lladrovcin e kanë krijuar një dyshe të fuqishme në mbrojtje.
Prekazi ka ditur edhe të shënojë gola këtë edicion. Ndër më meritorët që Feronikeli u shpall kampion.
Leotrim Bekteshi
Fitoi një vend në mbrojtjen e Prishtinës me Armend Dallkun, duke e lënë në bankë Ahmet Halitin.
I fortë në duele, i mirë me top dhe me një kërcënim të mrekullueshëm, Bekteshi tregoi që parat që i ka dhënë Prishtina nuk kanë shkuar aspak dëm.
Yll Hoxha
Asistime dhe gola. Çdo javë ai ishte protagonist te Feronikeli, duke e shtyrë skuadrën përpara.
E shënoi edhe golin e fitores në ndeshjen me Prishtinë.
Goditja e topit me këmbën e majtë, si në portë ashtu edhe me harkime, janë pika e fortë e tij, por edhe e Feronikelit këtë edicion.
Albert Dabiqaj
‘Motori’ i Feronikelit. Nuk ndalet kurrë në asnjë ndeshje. Të tjerët zëvendësohet në krah të tij, por ai ishte gjithmonë në çdo ndeshje aty.
Në ndeshjet vendimtare e fitoi çdo duel duke treguar se mund të luajë edhe në nivele më të larta se sa në Kosovë.
Më të në konkurrencë Hamdi Namani dhe Diar Miftar, por kampioni fitoi.
Mentor Zhdrella
‘Truri’ i Llapit. Njeriu që organizoi çdo aksion dhe ishte pjesë e pothuajse çdo goli.
Lider në mesfushë dhe me vizion të qartë për lojë. Shtatë gola dhe mbi dhjetë asistime, tregojnë edhe një herë që mbetet ndër më të mirët në Kosovë në pozitën e tij.
Në një konkurrencë të fortë me Endrit Krasniqin që po ashtu kishte një edicion personal fantastik.
Mendurim Hoti
10 gola në këtë edicion. Njëri prej më të mirëve te Nikli. Vrapon shumë, i rrezikshëm në depërtime, di edhe të asistojë.
Në çdo ndeshje ishte rrezik për portat kundërshtare.
Fitoi në konkurrencë me Kreshnik Ukën dhe Jetmir Topallin.
Meriton Korenica
Ylli i Prishtinës në sulm. Pa dyshim goditja e madhe e kryeqytetasve në këtë verë.
11 gola në kampionat dhe tri asistime.
Lëndimi i tij në fund i ka kushtuar Prishtinës, pasi më të, skuadra kishte më shumë fantazi në lojë.
Festim Alidema
Sulmuesi i krahut i Llapit, ishte një ndër më meritorët që skuadra e tij luftoi deri në fund për titull.
Shënoi 12 herë këtë sezon dhe ishte rrezik konstant për portat kundërshtare.
Një prej më të mirëve këtë edicion.
Kastriot Rexha
Nuk ka dyshim që sulmuesi më i mirë në kampionat është Kastriot Rexha i Feronikelit.
Ai i ka shënuar 21 gola këtë kampionat, duke e udhëhequr skuadrën e tij drejt titullit.
I fortë në ajër dhe duele dhe i saktë para porte, Rexha po del të jetë sulmues i titullit.
Trajneri i sezonit
Zekerija Ramadani tregoi edhe njëherë që futbolli sulmues që ai aplikon po del të jetë fitues.
Titulli i tij i dytë në Kosovë.
Lojtarët pas ardhjes së tij sikur morën krahë dhe nga pozitat e vështirë u kthyen shpejtë në luftë për titull. /Telegrafi/
Formacioni i sezonit
Banka rezervë
Flamur Neziri (portier) Lapidar Lladrovci (mbrojtës) Armend Dallku (mbrojtës) Përparim Islami (mbrojtës) Endrit Krasniqi (mesfushor) Diar Miftaraj (mesfushor) Blend Baftiu (mesfushor) Hamdi Namani (mesfushor) Kreshnik Uka (mesfushor) Dren Gashi (sulmues) Ahmed Januzi (sulmues)
