Flet kryetari i komunës së Vitisë: Situata është në kontroll, s’ka nevojë për panik

Në Kosovë 13 persona deri tash janë prekur nga virusi COVID-19, i njohur si coronavirus.

Deri më tani komuna e Vitisë, që është në karantinë, ka numrin më të madh të personave të prekur nga ky virus.

Kryetari i kësaj komune, Sokol Haliti në një prononcim për Telegrafin ka thënë se situata është nën kontroll.

Ai u ka bërë apel qytetarëve që të mos krijojnë panik.

“Vetëm sot katër kanë rezultuar deri tash sipas analizave që kanë dalë nga Instituti i Shëndetit Publik.  Aty ku ka dyshime ne i dërgojmë në Qendrën Spitalore në Prishtinë. Jemi duke u u munduar me mbajt gjendjen e qetë, i lus qytetarët që të mos kenë panik”, ka thënë Haliti.

Lexo po ashtu 13 raste me coronavirus në Kosovë, Vitia komuna me numrin më të madh të personave të prekur

Ai ka shtuar se nuk duhet të  lejojnë që virusi të shpërndahet edhe më tej, duke bërë apel qytetarëve që të shmangin daljet jashtë shtëpive.

“Situata është në kontroll, ajo çfarë ka ndodhur tashmë ka ndodhur, ne duhet të mos lejojmë që kjo të zgjerohet. I kemi marrë të gjitha masat e nevojshme. Qytetarët t’i respektojnë udhëzimet dhe të mbrohen”, ka thënë Haliti.

Kujtojmë se rasti i parë i prekur me coronavirus në këtë komunë u konfirmua të premten, dhe ai ishte një 77 vjeçar nga Stublla.

Menjëherë pas konfirmimit të këtij rasti, Vitia është futur në karantinë./Telegrafi/