​Filloi hapja dhe rregullimi i tri rrugëve në fshatin Llazicë të Malishevës

Sot ka filluar hapja, zgjerimi dhe rregullimi i tri rrugëve në fshatin Llazicë të Komunës së Malishevës. Rregullimi i këtyre rrugëve, bëhet në kuadër të rregullimit dhe ndërtimit të infrastrukturës rrugore në vendbanimet e Komunës së Malishevës dhe implementimit të planifikimeve komunale për këtë vit.

Në fillimin e punimeve ishte i pranishëm edhe drejtori komunal i urbanizmit, Ahmet Morina, i cili i pa nga afër punimet që po kryhen në këto rrugë. Drejtori Morina, gjithashtu u takua edhe banorët, të cilët i ka uruar për rrugët e reja.

“Kryetari i Komunës, Ragip Begaj, është i përkushtuar në realizimin e plotë të planifikimeve komunale, si dhe është i vendosur që brenda mundësive buxhetore, ti realizoj kërkesat dhe nevojat e banorëve në të gjitha fshatrat e Komunës së Malishevës. Pjesë e këtij përkushtimi janë edhe këto rrugë në fshatin tuaj, dhe ne sot kemi filluar me hapjen dhe zgjerimin e tyre, të cilat shumë shpejt do të përfundojnë me asfaltim, ashtu sikur jemi zotuar”, tha drejtori Morina, gjatë bisedës me banorë.