Ferdinand: Ronaldos iu vodh një Top i Artë, ai i fituar nga Modric

Rio Ferdinand ka pohuar se Cristiano Ronaldo u privua nga fitimi i një Topi të Artë në karrierën e tij dhe se ishte në vitin 2018, kur mesfushori i Real Madridit dhe kapiteni i kombëtares kroate, Luka Modric u shpall më i miri në botë. Sipas tij, më pas është bërë një padrejtësi dhe portugezit i është grabitur një njohje e madhe.

Ish-futbollisti i famshëm anglez po i përgjigjej një pyetjeje për Topin e Artë dhe krahasimet mes Lionel Messit dhe Cristiano Ronaldos, rivalë të mëdhenj dhe një dyshe që shumëkush pretendon se duhet quajtur më e mira në botë.

I pyetur se kush ka më shumë Topa të Artë, Ferdinand befasoi me përgjigjen e tij: “Messi. Shtatë me pesë. Ronaldo u vodh në vitin kur Modric fitoi”.

Lexo po ashtu Lista e lojtarëve që do të kishin fituar Topin e Artë nëse nuk do të ekzistonin Messi dhe Ronaldo

Në vitin 2018, Modric i dha fund mbretërimit të Messit dhe Ronaldos

Para se të fitonte Topin e Artë dhe t’i jepte fund dominimit dhjetëvjeçar të Messit dhe Rolandos, të cilët alternonin si pushtues të tij, Modric u shpall lojtari më i mirë i Kupës së Botës, UEFA e shpalli atë futbollistin më të mirë në Evropë dhe FIFA më të mirin në botë.

Në vitin 2018, ai fitoi disa tituj me Realin, duke përfshirë edhe Ligën e Kampionëve. Ky ishte trofeu i tij i katërt i tillë. Ai u bë gjithashtu nën-kampion i botës me Kroacinë.

Në vitin 2018, Modric mori 753 pikë në votimin për Topin e Artë. Cristiano Ronaldo, i cili ishte bashkëlojtari i tij në Real atë sezon dhe shënoi 44 gola dhe tetë asistime në 44 ndeshje, përfundoi i dyti në votim me 478 pikë. /Telegrafi/