Fauci për rritjen e rasteve me coronavirus: Jam shumë i shqetësuar sepse mund të bëhet shumë keq

Dr. Anthony Fauci, drejtor i Institutit Kombëtar për Alergji dhe Sëmundje Infektive, tha se SHBA “po shkon në drejtim të gabuar” pasi numri i rasteve të coronavirusit po rritet në vend.

Fauci tha se ndërsa disa shtete kanë marrë parasysh virusin, ai është shumë i shqetësuar për të tjerët, ku rastet kanë shënuar rritje.

“Është e qartë, ne nuk jemi në kontroll të plotë tani”, citohet të ketë thënë ai, shkruan CNN, përcjell Telegrafi.

Fauci tha se në lajme ai sheh njerëz që mblidhen në turma, duke mos veshur maska dhe shtete që “kërcejnë” mbi udhëzimet për rihapjen.

“Ne do të vazhdojmë të jemi në shumë telashe dhe do të vuajmë nëse kjo nuk ndalet”, ka paralajmëruar ai.

Të paktën 36 shtete aktualisht po shohin një rritje të rasteve në krahasim me javën e kaluar, sipas të dhënave nga Universiteti John Hopkins. Të paktën 11 nga ato shtete po shohin një rritje prej 50% ose më shumë në raste.

I pyetur se sa vdekje dhe infeksione nga COVID-19 që SHBA mund të priten përpara se të mbarojë pandemia, Dr. Anthony Fauci tha se ai nuk mund të bëjë një “parashikim të saktë”, por do të jetë “shumë shqetësuese”.

Fauci tha se vendi po sheh më shumë se 40,000 raste të reja në ditë, dhe se ai “nuk do të befasohej” nëse numri i rasteve shkon deri në 100,000 në ditë nëse tendenca aktuale “nuk ndalet”.

“Unë mendoj se është e rëndësishme t’i thuash publikut amerikan se jam shumë i shqetësuar sepse mund të bëhet shumë keq”, tha Fauci. /Telegrafi/