Familja amerikane kërkon 80 mijë dollarë dëmshpërblim nga NASA pasi mbeturinat hapësinore goditën shtëpinë e saj

Një familje në Napoli, Florida, shtëpia e së cilës u godit nga mbeturinat që ranë në Tokë nga hapësira dhe hapën një vrimë në çati, po kërkon 80 mijë dollarë nga NASA si kompensim për dëmet.

Kompania ligjore Cranfill Sumner tha në një deklaratë se ka ngritur kërkesë në emër të paditësit Alejandro Otero dhe familjes së tij për kompensim.

Bëhet e ditur se një cilindër metalik që ishte lëshuar nga Stacioni Ndërkombëtar i Hapësirës në vitin 2021, goditi shtëpinë e familjes Otero më 8 mars të vitit 2024.

Fatmirësisht, askush nuk u lëndua, megjithëse ai shkaktoi vrimë në çati dhe dysheme.

Otero tha se objekti për pak sa nuk goditi djalin e tij i cili ndodhej dy dhoma më lart, shkruan the Guardian, përcjell Telegrafi.

Më vonë, agjencia amerikane e hapësirës konfirmoi se objekti ishte nga pajisjet e saj mbështetëse të fluturimit.

Siç raportohet, NASA e bëri këtë përcaktim pasi mbeturinat u mblodhën nga shtëpia dhe u analizuan në Qendrën Hapësinore Kennedy.

Pretendimi i Oteros kundër NASA-s përmend dëmet për pronën e pasiguruar, ndërprerjen e biznesit, ankthin emocional e mendor, dhe koston e ndihmës nga agjencitë e palëve të treta.

“Klientët e mi po kërkojnë kompensim adekuat për të llogaritur stresin dhe ndikimin që kjo ngjarje pati në jetën e tyre”, tha në një deklaratë avokati i familjes Otero, Mica Nguyen Worthy.

“Ata janë mirënjohës që askush nuk ka pësuar lëndime fizike nga ky incident, por një situatë si kjo mund të ketë qenë katastrofike. Nëse mbeturinat do të kishin goditur disa metra në një drejtim tjetër, mund të kishte pasur lëndime serioze ose fatalitet”, shtoi ai.

NASA do të ketë gjashtë muaj kohë për t’iu përgjigjur pretendimit. /Telegrafi/