Facebook fillon integrimin e bisedave në Instagram, Whatsapp dhe Messenger në iOS dhe Android

Para pak kohësh në vitin e kaluar, drejtori ekzekutiv i Facebook Mark Zuckerberg e lansoi idenë e integrimit të Messenger, Instagram Direct dhe WhatsApp në një platformë të vetme mesazhesh.

Shkrirja e planifikuar e këtyre shërbimeve duhet të mundësojë mesazhe të enkriptuara për përdoruesit, midis shërbimeve të lartpërmendura.

Tani, raportet e reja pretendojnë se rrjeti i madh social tashmë ka filluar me bashkimin e Instagram dhe Messenger, si hap i parë i një përpjekje më serioze për të kombinuar plotësisht tre shërbimet në të ardhmen.

Kjo është vërejtur në sistemet operative të Android dhe iOS në SH.B.A., por akoma nuk dihet nëse opsioni është në dispozicion për të gjithë ose vetëm për një numër të kufizuar të përdoruesve në fillim.

Integrimi gjithashtu sjell disa karakteristika të reja, të tilla si ngjyrat e reja të bisedave, reagimi me emoticon, përgjigjja e shpejtë dhe biseda e tërthortë me përdoruesit e Facebook.

Mbetet të shihet nëse FTC (Komisioni Federal i Tregtisë) do të ndërhyjë dhe ndalojë këtë bashkim shërbimesh, për shkak të shqetësimeve për shkeljet e rregullave të antitrustit.