Erik ten Hag më në fund zbulon detaje nga takimi ‘sy me sy’ që pati me Sanchon

Trajneri i Manchester United, Erik ten Hag, ka dhënë detaje nga biseda ‘sy me sy’ që pati me Jadon Sanchon, teksa anglezi po përgatitet që të rikthehet në aksion.

Sancho është pjesë e ekipit të Manchester United i cili ka udhëtuar për miqësoren që do të zhvillohet ndaj ekipit skocez Rangers e që është paraqitja e tij e parë për ‘Djajtë e Kuq’ që nga muaji gusht.

Në fillim të shtatorit, dyshja ishin përfshirë në një debat publik për nivelin e Sanchos në stërvitje, diçka që çoi deri në përjashtimin e tij nga ekipi pas humbjes me rezultat 3-1 ndaj Arsenalit.

Sancho u përjashtua nga ekipi i parë pasi nuk i kërkoi falje Ten Hagut, kësisoji duke u rikthyer tek Borussia Dortmundi në formë huazimi për pjesën e dytë të sezonit.

Lexo po ashtu ’Pajtohen’ Sancho dhe Ten Hag, ylli anglez rikthehet në stërvitje tek Man United

Pritshmëritë ishin që Sancho të shitet, por tani ai është integruar në ekipin e parë pas bisedimeve pozitive me teknikun holandez.

Ani pse Ten Hag kishte refuzuar që të fliste për këtë takim javën e kaluar, ai tani ka folur për bisedën private që pati me Sanchon pas rikthimit të tij.

“Ne folëm mjaft mirë. Të gjithë mund të bëjnë gabime. Ne u sqaruam dhe vazhdojmë tutje. Ky ekip ka nevojë për lojtarë të mirë dhe një gjë është e sigurt: Jadon është një lojtar shumë i mirë”, ka thënë Ten Hag.

24-vjeçari e ndihmoi Dortmundin që të kualifikohet në finale të Ligës së Kampionëve dhe do të shpresojë të ketë një tjetër ndikim pozitiv në ekipin e United./Telegrafi/