Ekskluzive: Zbulohet personi që fotografoi Mimoza Kusarin e Ilir Dedën?

Kryetarja e Komunës së Gjakovës, Mimoza Kusari- Lila të hënën mbrëma publikoi një fotografi me deputetin Ilir Deda, derisa tregoi se kjo fotografi është shkrepur nga kryetari ose kryetarja e Iniciativës së Re, duke lënë kështu shumë pikëpyetje rreth asaj se kush mund të ketë qenë në këtë rast “fotografisti”.

Kusari-Lila në një intervistë dhënë në KTV nuk ka dashur të tregojë se kush do ta drejtojë partinë e re, ku ka theksuar se kryetar i kësaj partie është qytetari i Kosovës.

Mirëpo, lideri i AKR-së, Behgjet Pacolli në një deklaratë dhënë Telegrafit ka ngritur edhe më tej dyshimet duke thënë se mund të ketë qenë dora e tij që ka fotografuar Mimozën dhe Ilirin.

“Mimoza pati thënë se dora që i ka fotografuar ishte e kryetarit. Pra, ka mundësi që ka qenë dora ime”, ka thënë shkurt Pacolli.

Kusari- Lila e cila tashmë nuk është më pjesë e strukturave të AKR-së, ka thënë se secili e vazhdon rrugëtimin aty ku ndihet më i frytshëm.

Në media ishte thënë se pjesë e Iniciativës së Re do të jetë edhe deputetja e LDK-së, Vjosa Osmani, mirëpo një gjë të tillë është mohuar vetë Kusari- Lila, e cila ka deklaruar se Vjosa Osmani ka vendosur që të punojë në reformimin e partisë së saj./Telegrafi/