Efekti i Kate Middleton: Vizitat në faqet e këshillave për kancerin dhe të NHS-së u rritën pesëfish pas deklarimit të diagnozës nga Princesha

Vizitat në faqen e kancerit të uebfaqes së NHS (Shërbimi Kombëtari i Shëndetit në Mbretërinë e Bashkuar) u rritën gati pesë herë pas njoftimit të Kate Middleton se po vuan nga sëmundja e kancerit.

‘Cancer Research UK’ dhe ‘Macmillan’ gjithashtu raportuan një rritje të klikimeve. Në një video emocionale të lëshuar të premten në darkë, Princesha e Uellsit tregoi se muajin e kaluar ishte diagnostikuar me kancer, pasi kishte kaluar dy javë në Klinikën “London” për operacion abdominal në janar, shkruan DailyMail.

Duke ndjekur hapat e Mbretit, ekspertët shpresojnë që mesazhi i shpresës së Kate do të inkurajojë më shumë njerëz që jetojnë me sëmundjen të kërkojnë mbështetje. Shifrat tregojnë se në 24 orët pasi zbuloi se po bënte trajtimin, pati 2,840 vizita në faqen e NHS, që është një rritje prej 373 për qind në krahasim me të njëjtën periudhë javën e kaluar.

4,172 njerëz – ekuivalenti i një personi çdo tre sekonda – shikuan faqen e simptomave të kancerit në tre orët pas mesazhit të saj të regjistruar televiziv. Faqja kishte 1,922 vizita gjatë të njëjtës kohëzgjatje një javë më parë. Ndërkohë, ‘Cancer Research UK’ pati më shumë se 200,000 vizitorë në faqet e saj të mbështetjes dhe ‘Macmillan’ afër 100,000 deri në fund të së dielës – shifrat më të larta të fundjavës që nga COVID-i i parë kombëtar në mars 2020. Në fjalimin e saj televiziv, Kate foli për marrjen e kohës për t’i treguar fëmijëve të saj dhe për t’i siguruar ata se “do të jetë në rregull”.

Gemma Peters, shefja ekzekutive e ‘Macmillan Cancer Support’ tha se shumë pacientë me kancer do të lidheshin me fjalët e saj. Ajo tha: “Ne dëgjojmë çdo ditë nga njerëz që janë të shqetësuar për atë se si kanceri do të ndikojë në të dashurit e tyre dhe si më së miri të mbështesin njëri-tjetrin nëpërmjet tij. “Duke ndarë lajmet e saj, Princesha e Uellsit ka rritur ndërgjegjësimin për këto shqetësime dhe do të ndihmojë në inkurajimin e të tjerëve që kanë shqetësime, të vizitojnë mjekun e tyre dhe të kërkojnë mbështetje”.

Ajo shtoi: “Shumë do të jenë duke u solidarizuar me Princin dhe Princeshën e Uellsit në këtë kohë. “Disa nga mendimet e para që prindërit kanë pasi diagnostikohen me kancer janë se si mund të ndikojë kjo në fëmijët e tyre, dhe nëse të folurit me ta për këtë do t’i bëjë ata të shqetësohen, por është e rëndësishme t’u jepet atyre shansi të flasin hapur për frikërat e tyre”.

Njësoj, Michelle Mitchell, shefja ekzekutive e ‘Cancer Research UK’, tha se trafiku në internet u rrit me më shumë se 15 për qind të premten. Ajo tha: “Këto shifra tregojnë se si rastet e kancerit te njerëzit me profil të lartë mund të shërbejnë si një nxitje për t’i inkurajuar njerëzit të mësojnë më shumë ose të mendojnë për shëndetin e tyre”.

“Nëse njerëzit vërejnë diçka që nuk është normale për ta ose nuk po shkon, duhet të konsultohen me mjekun e tyre. Nëse kanceri zbulohet në një fazë të hershme, trajtimi ka më shumë gjasa të jetë i suksesshëm”, tha ajo. Ndryshimet në proceset normale të trupit ose simptomat e pazakonta dhe të pa-eklipsuara mund të jenë ndonjëherë një shenjë e hershme e kancerit. Simptomat që duhet të kontrollohen nga një mjek përfshijnë një gungë që shfaqet papritur, gjakderdhje e pa-eplikuar dhe ndryshime në gastrologjinë e trupit.

Në shumë raste, simptomat do të shkaktohen nga një gjendje tjetër, por nëse është kancer, një diagnozë e hershme do të thotë që është më e lehtë për t’u trajtuar. Ndryshime të thjeshta në stilin e jetesës – siç është ushqimi i shëndetshëm, marrja e ushtrimeve të rregullta dhe mos pirja e duhanit – mund të reduktojnë gjithashtu në mënyrë të konsiderueshme rrezikun e zhvillimit të kancerit. NHS tha se numrat kulmuan menjëherë pas njoftimit, me 1,678 vizita në faqen e simptomave që përfshijnë informacionin e llojeve të sëmundjeve, vërejtjen e simptomave dhe diagnozën e hershme midis orës 6pm dhe 7pm të premten e kaluar.

Profesor Peter Johnson, drejtori klinik kombëtar i NHS për kancerin, tha: “Marrja e një diagnoze të kancerit mund të jetë shumë frikësuese – ajo të përmbys jetën dhe të folurit për të mund të jetë shumë e vështirë për njerëzit – Princesha e Uellsit që flet me guxim për diagnozën e saj do t’ju ndihmojë të tjerëve të bëjnë të njëjtën gjë. “Falë kësaj, kemi parë një rritje në vizitat e njerëzve në informacion jetësor në faqen tonë të internetit rreth shenjave dhe simptomave – nuk ka dyshim se të folurit për kancerin shpëton jetë nëse inkurajon njerëzit të paraqiten më shpejt nëse diçka nuk shkon mirë”. /Telegrafi/