Dyshohet se e detyroi një grua t’i jap para, ndalohet një person në Gjilan – përfitoi rreth 50 mijë euro

Prokuroria Themelore në Gjilan, në bashkëpunim me Policinë e Kosovës, pas një hetimi intensiv dhe zbatimit të masave të veçanta hetimore, ka ndaluar të pandehurin D.S., për shkak të dyshimit se ka kryer veprën penale ‘’Detyrimi’’.

Sipas një njoftimi në rrjetin social në Facebook bëhet e ditur se i njëjti dyshohet që nga data 29 maj 2024, deri në momentin e arrestimit të tij, përmes kanosjes serioze, me qëllim të përfitimit të kundërligjshëm pasuror ka detyruar të dëmtuarin F.S., që t’i jepte shuma të ndryshme të parave, ku bazuar në provat e siguruara gjatë hetimit dyshohet se ka përfituar rreth 50 mijë euro nga i dëmtuari.

Tutje bëhet e ditur se me vendim të prokurorit i pandehuri D.S. gjendet nën masën e ndalimit 48 orësh dhe brenda afatit ligjor ndaj tij do të ushtrohet kërkesa për caktimin e masës së paraburgimit.

Edhe në raportin 24 orësh të Policisë bëhet e ditur se i dyshuari e ka kanosur një grua duke e detyruar t’i jap një shumë të parasë.

“Gjilan, 29.05.2024-26.03.2025, NN. Është arrestuar i dyshuari mashkull kosovar pasi që i njëjti duke e kanosur e kishte detyruar viktimën femër kosovare ti jap shumë të ndryshme parash. Me vendim të prokurorit pas intervistimit i dyshuari është dërguar në mbajtje”, thuhet në raport. /Telegrafi/