Dy automjete ushtarake u prishën në Kuala Lumpur në dy ditë radhazi – bllokuan trafikun dhe shkaktuan tallje në mediat sociale

Ushtria e Malajzisë ka kërkuar falje pasi dy nga automjetet e saj u prishën në Kuala Lumpur në dy ditë radhazi, duke bllokuar trafikun dhe duke shkaktuar tallje në mediat sociale.

Sipas mediave të huaja, përcjell Telegrafi, incidenti i parë ndodhi të premten, kur një tank PT-91M Twardy ngeci me probleme motori në një autostradë pranë ndërtesës së Parlamentit të vendit, tha ushtria në një deklaratë të shtunën.

Fotot në mediat sociale treguan bllokime trafiku të krijuara rreth tankut, ndërsa zyrtarët e ushtrisë dhe oficerët e policisë u përpoqën të “devijonin” makinat rreth tij.

Tanku u tërhoq nga një automjet rikuperimi 30 minuta më vonë dhe u kryen riparime, tha ushtria.

Dhe më pak se 24 orë më vonë, një mjet kryesor i blinduar – i përdorur kryesisht për tërheqjen e armëve të rënda – u prish në një rrugë të ngarkuar jashtë Muzeut Kombëtar në zemër të kryeqytetit.

Motoristët kuriozë u panë gjithashtu duke ngadalësuar shpejtësinë për të parë skenën e pazakontë.

Një ekip mekanikësh përfundoi punën e riparimit deri në orën 12:30 sipas kohës lokale të dielën, tha ushtria.

Automjeti vazhdoi më pas udhëtimin e tij drejt Dataran Merdeka, ose Sheshi i Pavarësisë, ku festimet e Ditës së Pavarësisë së Malajzisë do të mbahen më 31 gusht. Të dy automjetet u përfshinë në provat për paradën, tha ushtria.

“Ushtria kërkon falje për dy incidentet dhe do të sigurojë që kjo të mos ndodhë më”, thuhet në deklaratën e ushtrisë. “Por nëse do të përsëritet, një ekip rikuperimi në gatishmëri do të dërgohet në vendndodhje sa më shpejt të jetë e mundur për të tërhequr automjetin në mënyrë që të shmangen bllokimet e trafikut”. /Telegrafi/