Dy anije luftarake kineze kanë lundruar nëpër ujërat e Mbretërisë së Bashkuar, të vëzhguara nga afër nga një fregatë britanike, ka njoftuar Marina Mbretërore.
Bëhet e ditur se anija HMS mbajti nën vëzhgim anijet kineze ndërsa kaluan Britaninë e Madhe dy herë në tre javë, për në dhe nga Rusia.
Monitorimi i anijeve luftarake të huaja është një operacion rutinë për marinën, por është shumë më e zakonshme që Ministria e Mbrojtjes të publikojë gjurmimin e anijeve ruse në vend të anijeve të dislokuara nga Ushtria Çlirimtare Popullore Kineze (Marina), shkruan skynews, përcjell Telegrafi.
Ministri i Forcave të Armatosura Luke Pollard tha: "Këto përcjellje janë një demonstrim i qartë se si Marina Mbretërore vazhdon të mbrojë sovranitetin e ujërave të Mbretërisë së Bashkuar”.
“Të punosh ngushtë me aleatët tanë për të mbështetur sigurinë euroatlantike është një prioritet kryesor për këtë qeveri”, shtoi Pollard.
“Falënderoj ekuipazhin e HMS Richmond për kryerjen e një tranziti të sigurt dhe profesional dhe gjithçka që ata bëjnë për ta mbajtur vendin tonë të sigurt brenda dhe të fortë jashtë vendit”.
Siç raportohet, anija luftarake britanike monitoroi Jiaozuon e Kinës, një shkatërrues 7,500 tonësh, dhe Honghu, një anije furnizimi prej 23,400 tonësh, ndërsa bënin udhëtimin e tyre mbrapa dhe përmes Detit të Veriut dhe në Kanal.
Anija britanike e ndau detyrën e vëzhgimit të atyre kineze edhe me një anije luftarake franceze dhe një anije patrullimi nga marina belge.
Oficeri komandues i HMS Richmond, komandanti Richard Kemp, tha: "Duke mbajtur një prani të dukshme dhe të vazhdueshme, Marina Mbretërore demonstron përkushtimin ndaj aleancës së NATO-s dhe në ruajtjen e sigurisë detare, e cila është vendimtare për interesat tona kombëtare”.
Bëhet e ditur se dy anijet kineze fillimisht kaluan nëpër ujërat e Mbretërisë së Bashkuar për në Shën Petersburg për të marrë pjesë në një ngjarje vjetore të quajtur Dita e Marinës Ruse.
Hera e fundit që një lundrim i tillë ndodhi ishte në vitin 2019, kur anijet kineze bënë një udhëtim të ngjashëm për të marrë pjesë në të njëjtën ngjarje detare ruse. /Telegrafi/
